काठमाडौं । नेकपा एमालेका नेता माधवकुमार नेपालले पठाएको स्पष्टीकरणपत्र अध्यक्ष केपी शर्मा ओली र महासचिव ईश्वर पोखरेलको हातमा पुगेको छ ।
स्वकीय सचिवमार्फत केन्द्रीय कार्यालयमा बुझाइएको स्पष्टीकरण प्रधानमन्त्री निवास बालुवाटारमा लगिएको हो । दुवै नेतासहितले सो स्पष्टीकरण पढेको बताइएको छ ।
स्पष्टीकरणको जवाफ चित्त बुझ्दो नभएको र उल्टै प्रचण्डको मतियारका रुपमा आफ्नो पार्टी र अध्यक्षमाथि आक्षेप लगाइएको ओलीनिकट स्रोतको प्रारम्भिक प्रतिक्रिया छ ।
‘प्रचण्डको मतियार बनेर एमाले कब्जा गर्न फर्किएको हो ?’ भन्ने प्रश्नको जवाफमा माधव नेपालले ओलीमाथि नै प्रतिप्रश्न गर्दै एमाले-माओवादी एकीकरण किन गरेको भन्ने आशयको जवाफ फर्काएका छन् ।
माधव नेपालको स्पष्टीकरणमा कुनै पनि गल्ती र पश्चाताप नदेखिएको र प्रचण्डको १९ पन्ने अभियोगपत्रकै शैलीमा जवाफ दिएको भन्दै एमालेले थप कारबाही अघि बढाउने सम्भवाना रहेको एक नेताले बताए ।
स्पष्टीकरण पढेपछि अध्यक्ष ओली र महासचिव पोखरेल मन्त्रिपरिषद् बैठकमा छन् । सबैका स्पष्टिकरण अध्ययन गरेपछि विधानबमोजिम थप कारबाही प्रक्रिया अघि बढ्ने वा नबढ्ने पार्टीले निर्णय गर्ने बालुवाटारमै रहेका एक नेताले बताए ।
ती नेताले नेपाल प्रेससँग भने- कि त माधव नेपालले केपी ओलीमाथि लगाएका सबै आरोप सही हुन् भनेर स्पष्टिकरण चित्तबुझ्दो भयो भन्नुपर्यो । होइन भने त अब माधव नेपालमाथि कारवाही प्रक्रिया अघि बढ्छ । उहाँले एमालेमा फर्किएर पनि मिल्ने होइन, हिजो नेकपामा हुँदा जस्तै व्यवहारमा जाने देखियो, जुन कुरा अब स्वीकार्य छैन ।
