मोरङ । प्रदेश नं. १ को नाम कोशी राख्नुपर्छ भन्ने एमाले अध्यक्ष केपी ओलीको विचारको विरोधमा राष्ट्रिय एकता पार्टी, नेपालले विज्ञप्ति प्रकाशन गर्दै जनभावना विपरित नबोल्न भनेको छ ।
पार्टी अध्यक्ष प्रेमदीप थाम्सुहाङ्ग (लाजेसा)ले आइतबार विज्ञप्ति प्रकाशन गर्दै कोशी १ नम्बर प्रदेशको जनताको भाबना विपरित भएको तर्क गर्दै सच्याउन अनुरोध गरेका छन् ।
ओलीले शनिबार झापाको एउटा कार्यक्रममा प्रदेश १ को नाम कोशी राख्दाहुने विचार ब्यक्त गरेका थिए । सो विरुद्ध राष्ट्रिय एकता पार्टी, नेपालद्वारा प्रकाशित विज्ञप्तिमा भनिएको छ ‘लिम्बुवान र किराँत खम्बुवानका जनताले कोशी कहिल्यै नसहने, नस्वीकार्ने र भावना विपरित रहेकोले सचेत गराउँदछौं ।’
पार्टीले प्रदेशको नाम ‘लिम्बुवान किराँत–सगरमाथा’ घोषणा गर्नका प्रदेश सरकारसँग माग गरेको छ ।
त्यसैगरी रुस र युक्रेन बीचको युद्धमा नेपाल युक्रेनको पक्षमा दिएको अभिव्यक्तिप्रति पार्टीको ध्यानाकर्षण भएको जनाएको छ । ‘नेपालले लिएको परराष्ट्र नीति भनेको पञ्चशीलको आधारमा असंलग्न परराष्ट नीति हो ।’ विज्ञप्तिमा भनिएको छ यस्तो बेलामा तटस्थ बस्नु पर्नेमा अमुक देशको पक्ष वा विपक्षमा मतदान गर्नु घोर आपत्तिको बिषय हो । नेपाल सरकारले पेट्रोलियम पदार्थको अत्याधिक मूल्यवृद्धि गरेकोमा विरोध जनाउदै तुरुन्त फिर्ता लिन माग गरेको छ ।
