मोरङ । स्थानीय तहको निर्वाचनमा पार्टीले लिएको नीतिप्रति असहमति राख्दै मोहन बैद्य (किरण) नेतृत्वको नेकपा (क्रान्तिकारी माओवादी)को तीन प्रदेश समिति सदस्यसहित २५ जनाले पार्टी परित्याग गरेको घोषणा गरेका छन् ।
यसरी पार्टी परित्याग गर्नेहरुमा १ नं. प्रदेश समिति सदस्य सुरेन्द्र चपागाई (शुसान्त), प्रवेश पाण्डे (दामोदर), ओम मण्डल, मोरङ जिल्ला समिति सदस्य गोपाल मगर, महेन्द्र बिष्ट, टंकबहादुर बिष्ट लगायत ६ जना, क्षेत्र र गाउँ समितिका पदाधिकारी सदस्य गरी २५ जनाले सोमबार (बैशाख १२) संयुक्त विज्ञप्ति प्रकाशन गरी पार्टी परित्याग गरेको हो ।
पार्टीले आगामी बैशाख ३० गतेहुने स्थानीय तहको निर्वाचन बहिस्कार गर्ने र स्वतन्त्र उमेद्वारी दिएर निर्वाचन लड्न पनि सक्ने दोधारे नीति लिएर कार्यकर्तालाई अन्योल सिर्जना गरेको, जनयुद्धको जगमा जनविद्रोह भन्ने कागजी क्रान्तिले कार्यकर्तामा निराशा बढ्दै गएकोले विज्ञप्तिमा उल्लेख छ ।
स्थानीय तहको निर्वाचनलाई उपयोग गर्दै जनताको समस्या लिएर गाउँ, टोल छिरेर विद्रोहको आधार तयार पार्नुपर्नेमा उपयोग गर्दा दक्षिणपन्थी र बहिस्कार गर्दा क्रान्तिकारी भइन्छ भन्ने गलत मानसिकता रहेको संयुक्त विज्ञप्तिमा उल्लेख छ ।
पार्टीको कार्यदिशा सहि भएपनि कार्यनीति निर्माणमा चुकेर पार्टी बिघटनको दिशामा गएको, पार्टीले लिएको नीतिलाई नेतृत्वले आफू अनुकुल ब्याख्या गर्ने गरेकोले कार्यकर्तालाई अन्योलमा राखेर धोका दिन नमिल्ने भएको भन्दै आफूहरु कुनै न कुनैरुपमा जनताको पक्षमा संघर्षमा रहने उल्लेख गर्दै बैद्य माओवादी त्यागेको घोषणा गरेका हुन ।
