२०७४ फागुन २० आइतवार
बुटवल । प्रदेश ५ सरकारको मुख्यमन्त्री शंकर पोखरेल हुन् । उनी दाङका बासिन्दा हुन् ।
शुरुदेखि नै दाङलाई प्रशासनिक राजधानी बुटवल र नेपालगञ्जलाई औद्योगिक नगर बनाउने भन्दै आएका पोखरेल बुटवललाई देउवा सरकारले राजधानी तोकेपछि तनाबमा छन् ।
जसका प्रतिक्रिया स्वरुप उनले सरकारका अधिकांश नियुक्तिमा बुटवल र लुम्बिनी क्षेत्रलाई निषेध गर्न थालेका छन् ।
प्रदेश सभामा सभामुख माओवादीको भागमा पर्यो ।
यसमा शंकर पोखरेल र माओवादी नेता वर्षमान पुनको सल्लाहमा लुम्बिनी क्षेत्रका सांसद्को कुरा वेवास्ता गर्दै रोल्पाका पूर्णबहादुर घर्ती सभामुख बने । सभामुखमा रुपन्देहीका माधव शर्मा र गुल्मीका सुदर्शन बराल पनि दाबेदार थिए ।
उपसभामुख एमालेको भागमा पर्यो । एमालेले बर्दियाकी कृष्णी थारुलाई उपसभामुख बनायो ।
यस्तै मन्त्रिपरिषद् विस्तारमा पनि शंकर पोखरेल र वर्षमान पुनले क्षेत्रीयता देखाए । माओवादीले रोल्पाकै कुलप्रसाद केसीलाई आन्तरिक मामिला तथा कानुन मन्त्री बनायो ।
एमालेबाट लामो कसरतपछि नवलपरासीका वैजनाथ चौधरी भौतिक पूर्वाधार मन्त्री बने । उनलाई प्रवक्ता बनाएपनि उनीसँग खास खास विषयबारे जानकारी नै दिइएको छैन ।
दाङका ठाकुर डिसी मुख्य न्यायाधिवक्ता बन्दैछन् । नियुक्ति भइसकेको बधाई सहित दाङका एमाले नेताहरुले नै प्रचार गर्न थालेका छन् ।
तर यसको जानकारी प्रवक्तालाई छैन ।
एमालेबाट मन्त्री बनेका चौधरी भन्छन्म लाई जानकारी छैन मुख्यमन्त्रीज्यूले केही गर्नुभएको होला ।
