मोरङ । दक्षिणी मोरङको सुनबर्षी नगरपालिका–१ जोगिधापको गाउँले कुकुरहरुको आक्रमणबाट जंगली हरिण मारिएको छ ।
बिहिबार करिव १० बजेको समयमा जोगिधाप गाउँमा ५–६ वटा कुकुरहरुले लखेट्दै टोक्दै गरेको अवस्थामा स्थानीयबासीले भेटाएका थिए । हरिणको पछिल्लो भाग कुकुरले टोकेर अत्याधिक रगत बगिरहेको अवस्थामा बाँसघारीमा फेला परेको थिए ।
कुकुरहरुले आक्रमण गरिरहेको अवस्थामा हरिण फेला परेपछि स्थानीयबासीले सब डिभिजन वन कार्यालय पथरीमा खबर गरेका थिए ।
सब डिभिजन वन कार्यालय पथरीका प्रमुख दिवस चौधरी, मंगलबारेका सशस्त्र वन रक्षक सुबेदार ध्रुर्बराज अधिकारी लगायतको टोली जोगिधाप पुग्दा हरिण मरिसकेको अवस्थामा फेला परेको प्रमुख चौधरीले बताए ।
हरिणलाई स्थानीय प्रहरी, जन प्रतिनिधि, सञ्चारकर्मी लगायतको रोहबरमा सब डिभिजन वन कार्यालय पथरीको परिसर भित्र गाडिएको छ । भाले जातको हरिण करिव ४५ किलोको भएको अनुमान गरिएको थियो ।
हरिण भेटिएको सुनबर्षी १ जोगिधाप पूर्ब पश्चिम मुख्य सडक (वन जंगल) क्षेत्रदेखि करिव १६ किलो मिटर दक्षिण गाउँमा पर्दछ । हरिण खोला किनारहुँदै त्यहाँ पुग्दा कुकुरले आक्रणम गरेको हुनसक्ने वन कार्यालयले जनाएको छ । सिकारी कुकुरहरुले जंगलमै पनि हरिण, मृग मार्ने गरेको छ ।
