मोरङ । पत्रकार तथा विश्लेषक भवानी बरालले प्रदेशको नाम राखिएपछि कोशीमा आगो लागेकोले किरात राख्न आम पत्रकारहरुले जनमत तयार गर्नुपर्ने बताएका छन् ।
नेपाल आदिबासी जनजाति पत्रकार महासंघ (फोनिज)को २४ औं स्थापना दिवसको अवसरमा विराटनगरमा आइतबार (२८ साउन) आयोजित ‘पहिचान आन्दोलन र अबको बाटो’ सम्बन्धी अन्तरर्किया कार्यक्रममा बरिष्ठ पत्रकार बरालले सो कुरा बताएका हुन् ।
बरालले कोशी नाम राख्नुपर्छ भनेर एकै जनाले पनि माग नगरेको कारण जबरजस्ति कौशिक ऋषि (कोशी) दालिएकै दिनबाट आगो लाग्न सुरु गरेको बताए ।
प्रदेशको नाम किरात राखौं भन्दा गाली र तालि दुबै आउने गरेपनि किरात नाम आए पछि लिम्बुवान, कोचिला, शेर्पालुङ वा अन्य बिशेष क्षेत्रको अधिकार लिन सकिने बरालको तर्क थियो ।
प्रदेश नं. २ को नाम मधेश राखेर अग्रगमन भएजस्तै किरात नाम राखिए पहिचानवादीहरुको लागि खुट्टा टेक्ने ठाउँ हुने र प्रदेश अग्रगमनको बाटोमा अघि बढ्ने विश्लेषक भवानी बरालको भनाइ थियो ।
बरालले २००७, २०४६ र २०६२÷०६३ मा जनताको अधिकार स्थापनाको आन्दोलनमा पत्रकारहरुले जनमत सिर्जना गर्न महत्वपूर्ण भूमिका खेलेको भन्दै कोशी खारेजी र पहिचानको आधारमा पुनः नामकरण गर्न पत्रकार लाग्नुपर्ने बताए ।
नेपालको निर्वाचन जित्न भीसीआर (भटमास, चिउरा र रक्की) वितरणमा भर पर्ने भएको बताउदै पत्रकार बरालले आन्दोलनकै माध्यमबाट कोशी नाम खारेजी हुनुपर्ने तर्क प्रस्तुत गरे । उद्घाटन कार्यक्रममा शुभकामना मन्तब्य दिने क्रममा नेपाल पत्रकार महासंघ प्रदेश समितिको अध्यक्ष लिलाबल्लब घिमिरेले पनि प्रदेशको नाम किरात कोशी भए सबैलाई स्वीकार्यहुने विचार प्रस्तुत गरेका थिए ।
हिजो भएको उद्घाटन कार्यक्रममा किरात याक्थुङ चुम्लुङ केन्द्रीय अध्यक्ष प्रेम एक्तेनले नाम के राख्ने भनेर प्रदेश नं.१ पुनः नामङ्कन संयुक्त संघर्ष समितिलाई नाम माग गरे तुरुन्त दिइने बताएका थिए ।
फोनिजको संघीय अध्यक्ष गजुरधन राईको सभापतित्वमा भइरहेको कार्यक्रममा विश्लेषकहरु प्रा.डा. महेन्द्र लावति, खगेन्द्र संग्रौला, डम्बर खतिवडाले समेत बोल्ने कार्यक्रम छ ।
