मोरङको पथरीशनिश्चरे स्थित हरियाली सामुदायिक वनमा निर्मित दुई वटा पौडी पोखरीमा सुक्रबारदेखि स्वीमिङ सुरु भएको छ ।
पथरी बजार पूर्ब मुख्य सडकसँग जोडिएको हरियाली वनमा सुक्रबार उद्घाटनपछि स्वच्छ, सफा पोखरीमा सस्तो र सुरक्षित रुपमा स्वीमिङ पुलको उद्घाटन भएको हो । सामुदायिक वन जंगलसँग जोडिएकोले स्वच्छ अनि चिसो पानीमा पौडि खेल्नको लागि खुल्ला भएको हरियाली सामुदायिक वन उपभोक्ता समितिको अध्यक्ष काबुलबहादुर मगरले बताए ।
पौडि पोखरी उद्घाटन कार्यक्रमको प्रमुख अतिथि पथरीशनिश्चरे नगर प्रमुख मोहन तुम्बापोले हरियाली वनले पौडि पोखरी सुरु गरेर नगर विकासमा एउटा इटा थपेको बताएका छन् ।
हरियाली वन र हरियाली वन लिमिटेडको योजना सफलताको शुभकामना दिदै नगर प्रमुख तुम्बापोले शान्ति वनको वाल उद्यान, मनकामनाको ट्रि हाउसले पनि स्थानीय पर्यटक तानिरहेको भन्दै नगरपालिका सामुदायिक वनहरुसँग सहकार्य गर्न तयार रहेको बताए ।
कार्यक्रममा हरियाली सामुदायिक वन उपभोक्ता समितिको अध्यक्ष काबुलबहादुर मगरले हरियाली वनले ३८ करोडको डीपीआर बनाएर लागि रहेको बताए ।
पूर्ब पश्चिम मुख्य सडकसँग जोडिएको हरियाली वनमा वाल र वयस्क गरी २ वटा पौडी पोखरीे, चमेना गृह, सवारी सधान पार्किङ तयारीसँगै सुरु भएको हो ।
स्वीमिङ गर्न चाहनेहरुका लागि बयस्कका लागि २०० र बालबालिकाको लागि १०० प्रतिव्यक्ति शुल्क निर्धारण गरिएको छ । निर्धारित शुल्कमा हरियाली सामुदायिक वन र शेयर सदस्यहरुलाई २५ प्रतिशत छुट गर्ने कम्पनीको अध्यक्ष दिलबहादुर तामाङले बताए ।
उद्घाटन कार्यक्रममा इलाका प्रहरी कार्यालय पथरीका प्रमुख डीएसपी गणेश श्रेष्ठ, विष्णु ज्ञवाली, वडा अध्यक्षहरु लगायतको उपस्थिति रहेको थियो । सामुदायिक वन उपभोक्ता समितिको सचिव निर्मला क्षेत्रीले सञ्चालन गरेको कार्यक्रम कम्पनीको अध्यक्ष दिलबहादुर तामाङ, पञ्चायत मावि सञ्चालक समितिको अध्यक्ष युवाराज बास्कोटा, छिमेकी सामुदायिक वन उपभोक्ता समितिको अध्यक्षहरुको उपस्थिति रहेको थियो ।
