काठमाडौँ । ‘हाम्रो राष्ट्रिय सम्पदा जोगाउँ, धरहरा बनाउँ’ संघर्ष समितिले ‘मेरो धरहरा मै बनाउँछु अभियानलाई सफल पारौँ’ भन्दै प्रधानमन्त्री तथा मन्त्रिपरिषद्को कार्यालयमा ज्ञापनपत्र बुझाएको छ ।
संघर्ष समितिले दशौँ हजारको हस्ताक्षरसहित प्रधानमन्त्री केपी शर्मा ओलीका स्वकीय उपसचिव युवराज दाहाललाई ज्ञापनपत्र बुझाएको हो ।
राष्ट्रिय सम्पदा धरहरा वरीपरी कुनै पनि व्यापारीक भवन निर्णण गर्न नहुने र यो स्थललाई पर्यटकीयस्थल बनाउन मागसमेत संघर्ष समितिले गरेको छ । समितिका संयोजक वेदप्रकाश गौतमले धरहरा निर्माणमा आफूहरुले आवश्यक जनश्रमदान गर्न पनि तयार रहेको जानकारी दिए ।
ज्ञापनपत्र बुझ्दै उपसचिव दाहालले ऐतिहासिक धरोहर धरहरा बनाउने स्थानीयको सकारात्मक कार्यलाई आफूले विहिबारै प्रधानमन्त्रीसमक्ष पुर्याएर सम्बन्धित निकायमा धरहरा निर्माणको कार्य अगाडि बढाउने विषयमा पहल अगाडि बढाउने बताए ।
धरहरा तत्काल बन्नुपर्ने माग गर्दै समितिले चैत ३ देखि चैत ९ गतेसम्म बिहान १० बजेदेखि बेलुका ६ बजेसम्म लिखित हस्ताक्षर संकलन गरेको थियो ।
