काठमाडौं। नेपाली काँग्रेसका प्रभावशाली नेता स्व. नेता खुमबहादुर खड्काको श्रद्धाञ्जली कार्यक्रम दिउँसो १ बजेसम्म उनकै निवास सानेपामा राखिने भएको छ ।
यसअघि ९ बजेसम्म सानेपा घरमा राखेर त्यसपछि पार्टी कार्यालय लैजाने कार्यक्रम रहेको थियो ।
आफन्त हितैषीहरु भने आइतबार बिहानै खड्का निवासमा खड्कालाई श्रद्धाञ्जली दिन पुगेका छन् । त्यहाँ भीड नै लागेको छ ।
उनका छोरा अनुराग बेलायतबाट आउँदै गर्दा भारतबाट फ्लाइट छुटेपछि आउन ढिलाई हुँदा यहाँ पनि अन्तिम श्रद्धाञ्जलीको कार्यक्रममा फेरबदल भएको हो ।
शुक्रवार उपचारका क्रममा नयाँ दिल्लीस्थित अपोलो अस्पतालमा निधन भएका खड्काको शव शनिबार राती काठमाडौंमा ल्यार्इएको थियो ।
खड्काको शव शनिबार राती ९ बजेको जेट एयरको फ्लाईटमा दिल्लीबाट काठमाडौ ल्याइएको हो । एयरपोर्टबाट राती करिव ११ वजे कफिनमा राखिएको उनको शब वाहिर निकालिएको थियो।
नेपाली काँग्रेसका नेता तथा खड्का निकट रहेका राष्ट्रिय सभाका सदस्य रमेशजंग रायमाझीले दिएको जानकारी अनुसार खड्काका श्रीमती छोरी सहितका पारिवारिक सदस्य र सहयोगीहरु पनि काठमाडौं उत्रिएका हुन् ।
एयरपोर्टमा पुगेका शुभेच्छुकहरु कफिनमा राखिएको शब सहित खड्काको सानेपा निवास गएका थिए । त्यसपछि मात्र कफिनमा रहेको शब निकालिएको थियो ।
काँग्रेस प्रवक्ता विश्वप्रकाश शर्माले नेता खड्काको अन्तिम श्रद्धाञ्जलीका लागि आइतवार नेपाली काँग्रेस केन्द्रीय कार्यालयमा ९ बजेबाट १ बजेसम्म राखिने तयारी भएको बताए पनि छोरा अनुराग आउन ढिलाइ भएपछि दिउँसो १ बजेमात्र कार्यक्रम सुरु हुनेछ ।
त्यसपछिमात्र केन्द्रीय समितिको बैठकले श्रद्धाञ्जली एवं शोक प्रस्ताव पारित गर्नेछ। त्यसपछि उनको अन्तिम संस्कारको लागि पशुपति आर्यघाट लगिने छ।
भारतमा उपचारका क्रममा शुक्रवार निधन भएका खड्काको अपोलो अस्पतालमा ३९ दिनदेखि उपचार भइरहेको थियो ।
