काठमाडौं : मंगलबार ६१ औँ राष्ट्रिय सहकारी दिवस मनाइदै छ । दिवसको नारा, ‘दिगो विकास लक्ष्य प्राप्तिको लागि सहकारी’ भन्ने रहेको छ ।
२०१३ साल चैत २० गते चितवनमा बखानपुर ऋण सहकारी संस्था स्थापना भएको दिनको सम्झनामा हरेक वर्ष राष्ट्रिय सहकारी दिवस मनाउने गरिन्छ । अहिले नेपालमा झण्डै ३४ हजार भन्दा धेरै सहकारी संस्था दर्ता छन् ।
रोजगारी सिर्जना, गरिबी न्युनिकरण र देशको ग्राहस्थ उत्पादन तथा राजस्व संकलनमा सहकारी क्षेत्रको योगदान उल्लेखनीय मानिन्छ । तर सहकारी क्षेत्रलाई थप व्यवस्थित, मर्यादित र सुरक्षित बनाउन नसक्दा दर्ता भएकामध्ये झण्डै २० प्रतिशत सहकारी संस्था निष्क्रिय छन् ।
सहकारीको सिद्धान्त अनुसार चल्न नसक्दा दर्ता भएका सबै संस्था सञ्चालन नभएका हुन् । सहकारी क्षेत्रमा समस्या दिगो रुपमा समाधान गर्न भन्दै सरकारले सहकारी ऐन २०७४ जारी गरिसकेको छ ।
