विराटनगरमा रहेको नोेबेल अस्पतालले २० किलोको ट्युमर भएको एक व्यक्तिको सफल शल्यक्रिया गरेको छ । अस्पतालले कानको पछाडि पट्टी भएको २० किलोको ट्युमरको सफल शल्यक्रिया गरेको हो ।
पत्रकार सम्मेलन गर्दै अस्पतालले सुनसरीको दुहवी–१ का मोहम्मद इस्ताकको कानको पछाडिको भागमा रहेको ट्युमरको सफल शल्यक्रिया गरेको जानकारी गराएको छ । अस्पतालका डाक्टर आइप चेरियन नेतृत्वको टोलीले इस्ताकको ट्युमरको सफल शल्यक्रिया गरेको हो ।
डाक्टर चेरियनले यस्तो शल्यक्रिया कमैको हुने गरेको जानकारी दिनुभयो । उहाँले यस्ता अप्रेशन गर्नको लागि धेरै मेहनत गर्नुपर्ने भएकोले पनि यो शल्यक्रिया जटिल प्रकृतिको रहेको उल्लेख गर्नुभयो । यस्ताखालका ट्युमरले हड्डीमा असर गर्ने तथा नसाहरु धेरै हुने र त्यसलाई व्यवस्थापन गर्दै अप्रेशन गरिएको डाक्टर चेरियन बताउनुहुन्छ ।
विगत ५ वर्षदेखि सामान्य गाँठो जस्तो देखिएकोमा विगत एक वर्षदेखि गाँठो बढ्दै जाँदा २० किलोको सम्म भएको इस्ताकले जानकारी दिनुभयो । उहाँले एकाएक बढ्दा आफूलाई डर लागेर अस्पताल आउँदा समस्याको रुपमा देखिएपछि अप्रेशन गरिएको बताउनुभयो ।