१० कात्तिक । लोकतन्त्रप्रति आस्था राख्ने युवाहरुलाई एकताबद्ध गराएर लोकतन्त्रका लागि काम गर्न स्थापना भएको नेपाल तरुण दल ६७औँ स्थापना दिवस मनाउदै गर्दा अहिले आफै अलोकतान्त्रीक र विभाजनको पर्याय बनेको छ ।
लामो समयदेखि अपूर्ण अवस्थामा रहेको तरुण दलले आफुलाई पूर्णता दिन नसकिरहेकै बेला चर्को विवाद र विभाजनमा फसेको छ ।
विसं २०७३ कात्तिकमा अन्तिम साता केही पदाधिकारी मात्रै रहनेगरी अपूर्ण रुपमा पुर्नगठन भएको तरुण दल थप विस्तार हुनुको सट्टा भएका पदाधिकारीहरु नै एकले अर्कालाई कारबाही गर्ने अवस्थामा पुगेका छन् ।
गत भदौ २८ गते एकअर्कालाई कारवाहीको घोषणा गरेका अध्यक्ष जितजंग बस्नेत र महासचिव भूपेन्द्रजंग शाहीले तरुण दलको स्थापना दिवसको अवसरमा आयोजना गरिने कार्यक्रम पनि छुट्टा छुट्टै आयोजना गरेका छन् ।
बस्नेतले जारी गरेको विज्ञप्तिमा आज पार्टी केन्द्रीय कार्यालय सानेपामा चियापान कार्यक्रम आयोजना गरिने उल्लेख छ भने शाहीले पनि आजै पार्टी केन्द्रीय कार्यालयमै उपत्यकास्तरीय भेला आयोजना गरेर स्थापना दिवस मनाउने घोषणा गर्नुभएको छ ।
आफुले निस्कासन गरेका महासचिव शाहीलाई अध्यक्ष बस्नेतले बैठकमा नबोलाएपछि शाहीले छुट्टै कार्यक्रमको घोषणा गर्नुभएको हो । विसं २०१० साल कार्तिक १० गते विश्वेश्वरप्रसाद कोइरालाले स्थापना गरेको तरुण दल अहिले आपसी झगडामा रुमल्लीएको छ ।
