काठमाडौं । नेपाली कांग्रेसले धरान उपमहानगरपालिकाको उपनिर्वाचनको निर्वाचनमा पार्टीको तर्फबाट तिलक राईलाई टिकट दिएको छ ।
ललितपुरको सानेपामा शुक्रबार बसेको केन्द्रीय कार्यसमितिको बैठकले मेयरमा नेपाली कांग्रेसको तर्फबाट राईलाई उम्मेदवार बनाउने निर्णय गरेको हो ।
‘मंसिर १४ गते सम्पन्न हुने उप–निर्वाचन अन्तर्गत सुनसरी जिल्लाको धरान उप–महानगरपालिकाको प्रमुख पदका लागि पार्टीको विधान अनुसार धरान उप–महानगरपालिका कार्यसमिति, क्षेत्र नं. १ क्षेत्रीय कार्यसमिति र सुनसरी जिल्ला कार्यसमितिबाट सर्वसम्मत रुपमा तिलक राईको नाम सिफारिस भई आएकोले उक्त नामलाई अनुमोदन गर्ने निर्णय गर्दछ’, नेपाली कांग्रेसद्वारा जारी विज्ञप्तिमा उल्लेख छ ।
नेपाली कांग्रेसका युवा नेता राई धरानमा लोकप्रिय मानिन्छन् । उनको पक्षमा जनलहर बढ्दै गएको नेपाली कांग्रेस धरानका स्थानीय नेताहरूको दाबी छ ।
दुईतिहाइको बलियो कम्युनिस्ट सरकार चौतर्फी रुपमा आलोचित र बद्नाम हुँदै गइरहेका बेला नेपाली कांग्रेसले धरान उपमहानगरपालिकामा लोकप्रिय नेतालाई टिकट दिएपछि कम्युनिस्टहरूभित्र खैलाबैला उत्पन्न भएको चर्चा हुन थालेको छ ।
