काठमाडौं । नेपाली कांग्रेसलाई मंसिर १४ मा हुने उपनिर्वाचनका लागि उमेदवार टुंगो लगाउन सकस भएको छ । मंसिर १४ गते हुन लागेको उपनिर्वाचनका लागि भोलि (बिहीबार) उमेदवारी मनोनयन हुँदैछ । तर, आजसम्म पनि कांग्रेसले मुख्य स्थानहरुमा उमेदवार टुंगो लगाउन सकेको छैन ।
उमेदवार टुंग्याउन मंगलबार बिहान १० बजेदेखि बसेको बैठक निष्कर्षविहीन टुंगिएको हो । मंगलबार बिहान सभापति शेरबहादुर देउवाको निवास बूढानीलकण्ठमा बसेको पदाधिकारी बैठक १० घण्टासम्म चलेको थियो ।
प्रतिनिधिसभाको एकमात्र रिक्त स्थान कास्की–२ मा कसलाई टिकट दिने भन्नेमा छलफल केन्द्रित भएको थियो ।
दिनभरीमा उमेदवारको टुंगो नलागेपछि मंगलबारको बैठकमा संस्थापन पक्षले उमेदवारको निर्णय गर्ने जिम्मा सभापति देउवालाई दिन प्रस्ताव गरेका थिए । तर, संस्थापन इतर समूहले भने त्यसमा असहमति जनाएको थियो ।
बैठक बुधबार फेरि बस्ने जनाएको छ । उपनिर्वाचनका लागि बिहीबार चुनावी प्रक्रिया सुरु हुनेछ ।
