काठमाण्डौ,७ माघ । एमाले र माओवादी केन्द्रले प्रदेश सरकारमा भागबन्डा, राष्ट्रियसभा सदस्य उम्मेदवारी चयन र पार्टी एकता प्रक्रियालाई आज टुंगोमा पुर्याउने भएका छन् ।
दुवै दलका अध्यक्षबीच ओली निवास बालकोटमा हिजो भएको बैठकमा प्रदेश सरकार गठन, राष्ट्रियसभा उम्मेदवार चयन र पार्टी एकीकरण प्रक्रिया टुंगो लगाउन आज एकता संयोजन समितिको बैठक बोलाउने सहमति भएको हो । एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच हिजो यी तीनै विषयमा करिब तीन घन्टा वार्ता भएको थियो । ओली र दाहालको बैठकपछि एमाले उपाध्यक्ष भीम रावल, महासचिव ईश्वर पोखरेल, सचिव प्रदीप ज्ञवाली, विष्णु रिमालसहितका एमाले नेताहरूले पार्टी एकताबारे छलफल गरेका छन् । त्यसैगरी नेकपा माओवादी केन्द्रले आज बिहान पार्टी हेडक्वार्टरका बैठक बोलाएको छ ।
