काठमाडौं, ८ बैशाख । पार्टी फुटाउन संसदीय दल वा केन्द्रीय समिति एकमा ४० प्रतिशत भए पुग्ने गरी अध्यादेश ल्याउने सरकारको निर्णयमा प्रमुख प्रतिपक्षी नेपाली कांग्रेसले प्रतिक्रिया जनाएको छ । कोरोनाभाइरस महामारी संकटबाट उक्सिने कुरा गर्न छाडेर पार्टी फुटाउने अध्यादेश ल्याउन लागेको भन्दै कांग्रेसले बेमौसमी बाजा नबजाउन आग्रह गरेको हो ।
कांग्रेस प्रवक्ता विश्वप्रकाश शर्माले ट्वीट गर्दै भनेका छन्, ‘बेमौसमी बाजा´ नबजाऔं! संसारकै अहिलेको प्रधान प्राथमिकता कोरोनामाथि विजय हासिल गर्ने हो । नेपालका लागि पनि यतिबेला अन्य सबै बिषय गौण छन्, गौण रहनुपर्छ।’
सम्पूर्ण सोच र शक्ति नेपाल र नेपालीको रक्षाका लागि एकतापूर्वक समर्पित रहनैपर्ने शर्माको भनाइ छ । सोमबार बसेको मन्त्रिपरिषद बैठकले पार्टी फुटाउन संसदीय दल वा केन्द्रीय समिति एकमा ४० प्रतिशत भए पुग्ने गरी अध्यादेश ल्याउने निर्णय गरेको थियो ।
