२४ माघ, काठमाडौं ।
राष्ट्रियसभा सदस्य चुनाव ६ वटै प्रदेशमा जारी छ । प्रदेश १ को विराटनगर, ३ को ललितपुर, ४ को पोखरा, ५ को दाङ, ६ को सुर्खेत र प्रदेश ७ को डोटीमा निर्वाचन जारी छ /
प्रदेश २ मा भने आठै जना सदस्यहरु निर्विरोध निर्वाचित भइसकेका छन् ।
६ वटै प्रदेशमा बिहान १० बजेदेखि मतदान शुरु भएको र दिउँसो ३ बजे सकिने निर्वाचन आयोगका प्रवक्ता नवराज ढकालले जानकारी दिए ।
निर्वाचन सकिएलगत्तै मतगणना सुरु हुनेछ । बिहीबारबाटै परिणाम आउन सुरु हुने र शुक्रबारभित्र सबै परिणाम सार्वजनिक गरिसक्ने ढकालले बताए ।
प्रदेश १ मा लिम्बुवान सांसदको बहिस्कार
प्रदेश १ मा बुधबार बिहानैबाट मतदान सुरु भएको छ । एक सांसद रहेको संघीय लिम्बुवान मञ्चले भने मतदान नगर्ने जनाएको छ ।
प्रदेश १ मा राष्ट्रिय सभाका ८ सांसदका लागि ९३ प्रदेशसभा र १३७ स्थानीय तहका २७४ समेत गरी ४११ जना जनप्रतिनिधिहरुले मतदान गरेका छन् ।
प्रदेश सांसदको मतभार ४८ छ भने नगरपालिका र गाउँपालिकाका प्रमुख उपप्रमुखहरुको मतभार १८ हुनेछ ।
प्रदेश १ का कुल ९३ प्रदेश सांसदहरुमध्ये वामपन्थी दलहरुको ६७ मत छ भने कांग्रेसका २१ प्रदेश सांसद छन् । बाँकी ५ जना अन्य दलका छन् ।
प्रदेश १ मा खुल्ला तर्फका केही सदस्यहरु निर्विरोध भइसकेका छन् ।
आज ३ बजे सम्पन्न हुने प्रदेश १ को राष्ट्रियसभा चुनावमा दुई पक्षका उम्मेदवारहरु वीच मतदान भइरहेको छ ।
