काठमाडौं । पार्टी एकतालाई टुंगोमा पुर्याउन एमाले र माओवादी अध्यक्षको अन्तिम रस्साकस्सी चलिरहेको छ । बुधबार दुई अध्यक्षबीच ‘वान टु वान’ वार्ता पछि एमालेको स्थायी कमिटी बैठक बस्ने तयारी भैरहेको छ ।
एमाले अध्यक्ष केपी शर्मा ओलीले पार्टी स्थायी कमिटीको आकस्मिक बैठक पनि डाँकेका छन् ।
एमाले नेता वामदेव गौतमले अहिले नै सहमतिका विषय ‘डिस्क्लोज’ गर्न नमिल्ने बताए । ‘अहिले नै सहमतिका विषयहरू उल्लेख गर्न मिल्दैन,’ गौतमले रातोकलमसँग भने ‘सहमति भैसकेको छ, एकता रोकिदैन, व्यवहारिक र सैद्धान्तिक पक्षहरू मिलाउँदै जानेछौं ।’
आजै पार्टी एकता संयोजन समितिको बैठक बस्ने बताउँदै गौतमले दुबै पार्टीका आन्तरिक बैठकहरू र संयुक्त बैठक बसेर सबै विषय टुंगो लगाउने बताए ।
ललितपुरको मानभवनस्थित एक घरमा एमाले अध्यक्ष ओली र माओवादी अध्यक्ष पुष्पकमल दाहाल प्रचण्डबीच ‘वान टु वान’ बैठक भएको छ ।
अहिलेसम्म दुई अध्यक्षको मात्रै बैठक हुँदै आएको मानभवनस्थित प्रचण्ड निकटका ठेकेदार शारदाप्रसाद अधिकारीको घरमा एमाले पार्टीकै बैठक पनि बस्ने भएको छ । पार्टी बैठकबाट एकमत बनाउन र पार्टी एकतालाई अन्तिम टुंगो लगाउन छिटो होस् भनेर एमालेको बैठक नै मानभवनमा डाँकिएको एमाले नेताले जानकारी दिए ।
माओवादीका नेतहरू पनि मानभवनमा आन्तरिक छलफलका लागि पुग्ने बताइएको छ । पार्टी एकता संयोजन बैठक पनि यही घरमा हुने भएकोले सर्वाधिक चासो र ध्यान मानभवनमा खिचिएको छ ।
