काठमाडौं। प्रधानमन्त्री एवं एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहालबीच पार्टी एकता र सरकारमा सहभागी हुने विषयमा सहमति भएको छ। सोमबार भक्तपुरको एक निजी घरमा भएको दुई नेताबीचको गोप्य वार्तामा सहमति भएको स्रोतले जनाएको छ।
दुई नेताबीच भएको सहमतिलाई एकता संयोजन समितिको बैठकबाट पूर्णता दिने सहमति भएको छ। पार्टी एकता संयोजन समितिको बैठक सोमबार बेलुका बस्दैछ। र, सो बैठकले दुई नेताबीच भएको सहमतिलाई अन्तिम रुप दिनेछ।
ओली र दाहालबीच भएको सहमतिलाई अन्तिम रुप दिन सोमबार सात बजे प्रधानमन्त्री निवास बालुवाटारमा एकता संयोजनक समितिको बैठक बोलाइएको छ। दुई नेताबीच भएको सहमतिपत्रमा एकता संयोजन समितिको बैठकपछि दुवै नेताले हस्ताक्षर गर्ने कार्यक्रम रहेको छ। ओली र दाहालबीच पार्टी एकता पद बाँडफाँड र सरकारमा सहभागितालगायतका विषमया सहमति भएको बताइएपनि सार्वजनिक भने गरिएको छैन।
