काठमाडौ, फागुन १० गते । स्वास्थ्य मन्त्रालयले फागुन १२ देखि १४ सम्म देशका २४ जिल्लामा हात्तीपाइले रोगविरुद्धको औषधि खुवाउने भएको छ । स्वास्थ्य मन्त्रालय इपिडिमियोलोजी तथा रोग नियन्त्रण महासाखाका प्रमुख डा. भीम आचार्यले
आम औषधि सेवन कार्यक्रमअन्तर्गत यो वर्ष पनि हात्तीपाइले रोगविरुद्धको औषधि खुवाउन लागिएको जानकारी दिनुभयो ।
उहाँले औषधि खुवाउने २४ जिल्लामा पाँचथर, ईलाम, झापा, भोजपुर, धनकुटा, मोरङ, उदयपुर, लमजुङ, पर्वत, बागलुङ, कपिलवस्तु, दैलेख, दाङ्ग, बाँके, बर्दिया, बझाङ्ग, बाजुरा, अछाम, डोटी, कैलाली, दार्चुला, बैतडी, डडेल्धुरा र कञ्चनपुर रहेका छन् ।
इपिडिमियोलोजी तथा रोग नियन्त्रण महाशाखाका निर्देशक आचार्यले ९१ लाख ५४ हजार व्यक्तिलाई औषधि खुवाइने जानकारी दिनुभयो । उहाँले हात्तीपाइलेको औषधि सेवन गर्दा दुई बर्ष नपुगेका केटाकेटीहरू, गर्भवती र ७ दिनसम्मका सुत्केरी महिलाहरू, छारे रोगी तथा सिकिस्त बिरामीहरूले खान नहुने बताउनुभयो । उहाँले औषधि खाँदा खाली पेटमा नभई खानासँगै अर्थात् खाना खाएपछि मात्रै खान उपयुक्त हुने सल्लाह दिनुभयो । खाली पेटमा खाँदा समस्या निम्तिन सक्ने उहाँको भनाइ छ ।
