विराटनगर / भारतको तुलनामा नेपालमा इन्धनको मूल्य सस्तो भएपछि तस्करी बढेको छ । प्रतिलिटर २० रुपैयाँसम्म सस्तो भएका कारण सीमावर्ती क्षेत्रबाट इन्धनको तस्करी बढेको हो ।
प्रहरीका अनुसार विराटनगरमा पेट्रोल पम्पबाट खरिद गरेर इन्धन भारततर्फ तस्करी हुने गरेको छ । मङ्गलबार मात्रै प्रहरीले विराटनगर–१२ बखरीबाट १३ वटा ग्यालेनमा राखिएको ६ सय ८० लिटर डिजेल बरामद गरेको छ ।
नेपालबाट भारततर्फ अवैधरूपमा चोरी निकासी गरी लैजानका लागि राखिएको अवस्थामा डिजेल बरामद गरेको जिल्ला प्रहरी कार्यालय मोरङका प्रहरी नायब उपरीक्षक मानबहादुर राईले जानकारी दिए । मोरङकै सीमावर्ती क्षेत्रमा केही दिनअघि तेल तस्करको समूहले प्रहरीमाथि आक्रमण गरेको छ ।
नेपाल आयल निगमले इन्डियन आयल कर्पोरेसनबाट इन्धन खरिद गरेर नेपालमा वितरण गर्दै आएको छ । तर नेपालको तुलनामा भारतमा इन्धन महँगो भएका कारण सीमावर्ती क्षेत्रबाट भारत तस्करी हुने गरेको प्रहरीले जनाएको छ ।
