नवराज भट्टराई
उर्लाबारी – मोरङको उर्लाबारीमा निर्माणाधीन बसपार्क अलपत्र परेको छ । बजेट नहुँदा वहुवर्षीय योजनाको बसपार्क निर्माणको काम ठप्प भएको छ ।उर्लाबारी–६ मा २०७१ सालदेखि बसपार्क निर्माणको काम सुरु भएपनि अहिलेसम्म एक तिहाइ काम पनि सम्पन्न भएको छैन ।
सहरी विकास मन्त्रालय अन्तर्गत सहरी विकास तथा भवन डिभिजन विभागले सुरु गरेको बसपार्क निर्माणका लागि पर्याप्त बजेट विनियोजन नहुँदा ६ वर्षमा ३ करोड ५५ लाख रुपैयाँ बराबरको काम मात्र भएको छ । बसपार्क निर्माणका लागि दाताले १ विघा १३ कठ्ठा जग्गा निःशुल्क प्रदान गरेका थिए । सुरुमा विनियोजन भएको ४० लाख रुपैयाँ अम्बिका बोहोरा अध्यक्ष रहेको जग्गा खोजविन समितिले खर्च गरेको थियो ।
त्यसपछि २०७४/०७५ मा २ करोड ६५ लाख रुपैयाँले जमिन पुराई, ढुंगाको वाल, शौचालय निर्माण, लोकमार्गदेखि जाने ४ सय मिटर बाटो कालोपत्रे लगायतका कार्य भएको थियो । आर्थिक वर्ष २०७६/०७७ मा छुट्याइएको ५० लाख रुपैयाँले कम्पाउण्ड घेराबारा, यात्रु प्रतिक्षालय निर्माणलगायत बनाइएको थियो । वहुवर्षीय योजना अन्तर्गत अगाडि बढेको बसपार्क निर्माणमा यस वर्ष कुनै बजेट विनियोजन गरिएको छैन । बसपार्क निर्माणका विषयमा बुझ्न बुधबार मोरङ क्षेत्र नं. १ का सांसद घनश्याम खतिवडा, उर्लाबारी–६ का वडाध्यक्ष चिन्तामणि पौडेल, एमाले नेता भूपालसिं जिमीलगायत मन्त्रालयमा पुग्दा यस वर्ष बजेट नभएको जवाफ पाएका छन्
।
उर्लाबारी बसपार्क निर्माण सम्पन्न गर्न अझै १० करोड रुपैयाँ लाग्ने अनुमान गरिएको छ । बसपार्कको रनवे कालोपत्रे, सपोर्ट वाल, ड्रेन निर्माण, लोकमार्गबाट
बसपार्कसम्म जाने बाटो कालोपत्रेलगायत काम बाँकी रहेको वडाध्यक्ष पौडेलले बताए । बसपार्क निर्माणका लागि पहल गरिरहेको बताउँदै उनले बसपार्क वहुवर्षीय आयोजना भएकोले निर्माण कार्य कहिले सम्पन्न हुने भन्ने अन्योल भएको बताए ।
उर्लाबारी नगरपालिकाका नगर प्रमुख खड्ग फागोले बसपार्क निर्माणको काम चित्तबुझ्दो नभएको बताए । “बसपार्क निर्माण सम्पन्न गर्न अझै १० करोड लाग्ने अनुमान छ” उनले भने, “मन्त्रालयले वर्षको ४०/५० लाख मात्र छुट्याउने हो भने निर्माण सम्पन्न हुन अझै २० वर्ष लाग्न सक्छ ।” मन्त्रालयले बसपार्क होइन, रिक्सा पार्क जस्तो गरी बजेट छुट्याएको भन्दै मेयर फागोले असन्तुष्टि जनाए ।
बसपार्क बनाउँछु भनेर जनताको आँखा छल्ने काम भएको बताउँदै उनले चाँडै निर्माण सम्पन्न गर्न सम्बन्धित निकायमा पहल गर्ने बताए । पहल गर्दा पनि मन्त्रालयले चाँडो सम्पन्न गर्न चासो नदेखाए नगरपालिकाले विकल्प खोजेर अघि बढ्ने उनको भनाई छ । उर्लाबारीको भविष्यसँग जोडिएको विषय भएकोले अब नगरपालिकाले जसरी पनि काम पूरा गर्ने मेयर फागोले बताए ।
निर्माणमा लापरबाही
बसपार्क निर्माणमा लापरबाही भएको पाइएको छ । स्थानीय गजेन्द्र दंगालले भने, “बसपार्क जाने बाटोमा गरिएको कालोपत्रे कमसल भएको भन्दै स्थानीयले बिरोध
गरेपछि ठेकेदारले दोहोर्याएर कालोपत्रे गरे ।” काम छारो हालेको जस्तो मात्र भएको उनले बताए । बसपार्कमा निर्माण गरिएको यात्रु प्रतिक्षालयको बस्ने काठ समेत मक्किएका छन् । बसपार्क निर्माणको आधा काम नहुँदै लथालिङ्ग भएपछि स्थानीयमा चाँडै बसपार्क निर्माण सम्पन्न हुने आश मर्न थालेको उनले बताए ।
दुव्र्यसनीको अखडा :
स्थानीयका अनुसार अलपत्र बनेको उर्लाबारी बसपार्क अहिले दुव्र्यसनीको अखडा बनेको छ । दैनिकजसो दुव्र्यसनमा लागेका युवाहरु भेला हुने भएकोले कुनै दिन अप्रिय घटना घट्न सक्ने उनीहरु बताउँछन् । “इलाका प्रहरी कार्यालय नजिकै भएपनि कहिल्यै सो क्षेत्रमा प्रहरीको गस्ती देखिँदैन” एक स्थानीयले भने, “दुव्र्यसनीको अखडा बनेको छ, कति बेला के हुन्छ भन्न सकिने अवस्था छैन ।”
