उर्लाबारी, १० चैत
उर्लाबारी नगरपालिकाको महिला, बालबालिका, ज्येष्ठ नागरिक एवम् अपांगता शाखाले सोमबार आगामी बर्षको बार्षिक कार्य योजना निर्माण गरेको छ ।
सो शाखाले अपांगता रोकथाम तथा पुनस्र्थापना कार्यक्रमको योजना निर्माणका लागि अन्तरक्रिया कार्यक्रम समेत गरेको शाखाकी प्रमुख अधिकृत चन्द्रकला सुब्बा जानकारी दिएकी छन् ।
उक्त शाखाकी संयोजक एवम् नगर उपप्रमुख लक्ष्मीदेवी भण्डारीको सभापतित्वमा भएको कार्यक्रममा करुणा फाउन्डेसन नेपालकी कार्यक्रम अधिकृत सगुन गुरुङले सहजिकरण गरेकी थिइन् ।
सो अवसरमा स्वास्थ्य शाखा संयोजक तोयानाथ घिमिरे, जनप्रतिनिधिहरु, महिला स्वास्थ्य स्वयम् सेवीका, अपांगता भएका व्यक्तिहरुको उपस्थिति रहेको थियो ।उर्लाबारी नगरपालिका, करुणा फाउन्डेसन र सामाजिक बिकास मन्त्रालय प्रदेश नं. १ ले आर्थिक बर्ष २०७८/०७९ का लागि ३० लाख १६ हजार ६० रुपैयाँको बजेट तय गरेको छ ।
जसमा उर्लाबारी नगरपालिकाले १० लाख ७२ हजार ८० रुपैयाँ व्यहोरेको अधिकृत सुब्बाले बताएकी छन् ।
