एमाले संसदीय दलको बैठकमा माधव नेपाल पक्षका नेताहरुले पार्टीलाई एक बनाइराख्ने जिम्मा अध्यक्ष ओलीकै भएको बताएका छन्।
शुक्रबार बालुवाटारमा भएको संसदीय दलको बैठकमा बैठकमा बरिष्ठ नेता झलनाथ खनाल, घनश्याम भुसाल, गोकर्ण विष्ट र आफूले कुरा राखेको भट्टराईले जानकारी दिए।
बैठकमा बोल्न आफू लगायत अन्य तीनै जनाले एमालेलाई एक बनाएर लैजान ओली नै पहल गर्नुपर्ने सुझाव दिएको भट्टराईले बताए।
‘देशको प्रधानमन्त्री, पार्टीको अध्यक्षको हैसियतले त्यसको पहलकदमी तपाई आफैँले गर्नुपर्छ भन्यौँ’ भट्टराईले भने, ‘पहिलेका तीता मीठा कुरा बिर्सेर जाउँ। उत्तेजित भएर होइन संयमित ढंगले अघि बढौँ भन्ने कुरा भयो।’
यो मुलुकले एमालेका साथै सम्पूर्ण वामपन्थीको एकता र स्थिरता खोजेकाले त्यसलाई आत्मसाथ गरेर अघि बढ्न आफूहरुले सुझाव दिएको भट्टराईले बताए।
पार्टीलाई २०७५ जेठ २ गतेकै अवस्थाबाट अगाडि बढाउनु पर्ने सुझाव पनि ओलीलाई दिएको उनले जानकारी दिए।
प्रधानमन्त्रीले आफूहरुको कुरालाई गम्भीरताका साथ लिएको र आफू छलफलका लागि सधैँ तयार रहेको बताएको भट्टराईले जानकारी दिए।
