विराटनगर : नेकपा (माओवादी)का अध्यक्ष गोपाल किराँतीले सर्वोच्च अदालतले राजनीति गरेर आफूहरूलाई भाटा हानेको टिप्पणी गरेका छन् ।
बिहीबार पत्रकार महासंघ मोरङको सभाहलमा आयोजित पत्रकार सम्मेलनमा किरा“तीले प्रचण्डले विघठन गरेको माओवादी केन्द्रलाई आफूहरूले पुनगर्ठन गरेर अघि बढाए पनि सर्वोच्चले राजनीति गरिदिएको आरोप लगाए ।
‘सर्वोच्चले राजनीति गर्यो, राजनीति गर्दा हामीमाथि अन्याय भयो’ उनले भने, ‘नेकपालाई त बञ्चरो नै हानेको हो, हामीलाई पनि दुईचार भाटा हानेको छ, अब गणतन्त्रमाथि चुनौती बढ्यो, त्यै भएर एक पटकलाई भाटा खपौं भनेका छौं ।’
किराँतीले नेपालमा लोकतन्त्रवादी र कम्युनिष्ट भनिएका पार्टीहरू सच्चा रुपमा लोकतन्त्रवादी र कम्युनिष्ट नभएको आरोप लगाए ।
उनले विद्यमान निर्वाचन प्रणालीलाई हटाएर २० प्रतिशत सांसदहरू मजदुरबाट र ६५ प्रतिशत किसानबाट चुनिने समाजवादी निर्वाचन प्रणाली लागू गर्नुपर्ने तर्क पेश गरे । बाँकी मात्रै पूँजीपति वर्गलाई छोड्नुपर्ने उनले बताए ।
सरकारले चुच्चे नक्सा सार्वजनिक गरेर राम्रो काम गरेको उनले बताए । सुगौली सन्धीको खारेजी गर्दै टिष्टा काँगडासम्मको नेपाल निर्माणका लागि सबै नेपाली सशक्त रुपमा अघि बढ्नुपर्ने उनले आग्रह गरे ।
आफूहरू निर्वाचनकै पक्षमा रहे पनि आफ्नो गठबन्धन नीति मिल्ने दलहरूसँग मात्रै हुने किराँतीले बताए । त्यस्तो नीति पुष्पकमल दाहाल ‘प्रचण्ड’ र डा.बाबुराम भट्टराईसँग मिल्ने पनि उनले स्पष्ट पारे ।
