उर्लाबारी, १३ बैशाख
मोरङको उर्लाबारी बक्राहा खोलाबाट रतुवामाई नगरपालिका क्षेत्रमा जाने नहर कुबेत सरकारको सहयोगमा धमाधम बनिरहेको छ । अहिले खोला नियन्त्रण एवं सिंचाईका लागि हेडबक्स र इन्टेक(मुहान) निर्माणको काम भइरहेको छ ।
बक्राहा-खैदुगसरा (खैरेनी, दुर्गापुरी, गगँटे, सखुवानी र रातेहोली) सिंचाई जल उपभोक्ता संस्था उर्लाबारी नगर पालिका वडा नं.-८ लाई सिंचाईका लागि ४
करोड ७६ लाख रुपैयाँ कुवेत सरकारले सहयोग गरेपछि आयोजनाको काम सुरु भएको समितिका अध्यक्ष बिष्णु निरौलाले जानकारी दिएका छन् ।
गएको पुस १३ गते शिलान्यास भएको सो आयोजना संघीय
सरकारले सिंचाई विभाग मार्फत ३ करोड ४१ लाख रुपैयाँमा ठेक्का लगाएको थियो । सो आयोजनाको काम पृथ्वी कन्सल्टेन्सी एण्ड इनर्जी ग्रुप सर्लाहीले पाएपछि काम धमाधम अगाडि बढिरहेको छ । पूर्व पश्चिम राजमार्गको बक्राहा खोलाको पूर्व-दक्षिणमा कोशी-बक्राहा नदी नियन्त्रण कार्यालयले तटबन्धको काम गरिरहेको छ ।
पूलबाट दक्षिण तर्फ ५ सय ४६ मिटर बाँध निर्माण कार्य धमाधम भइरहेको छ । उक्त बाँधसँग जोडेर उच्च बाँध र सिंचाईका लागि आवश्यक हेडबक्स र इन्टेक निर्माण भई
रहेको छ ।
उर्लाबारी ८, ९, रतुवामाई १०,९ र ८ नं. वडाका किसानहरुको खेतबारीमा बक्राहा खोलाको पानी बाह्रै महिना पुर्याउने उदेश्यले यो सिंचाई आयोजनाको काम सुरु गरिएको बक्राहा-
खैदुगसरा जलउपभोक्ता संस्थाका अध्यक्ष बिष्णु निरौलाले बताएका छन् । उनले भने- ‘बक्राहा पूलको पूर्वतर्फबाट किनारै किनार दक्षिणतर्फ बाँध निर्माण कार्य भइरहेको छ । यो बाँध १५ फिट उचाई र २० फिट चौडाईको रहेको छ । बाँधसँगै जोडेर हेडबक्स निर्माण गरिएको हो ।’ ढुङ्गा र तारजाली लगाएर बनाइएको हेडबक्सबाट इन्टेकमा पानी पुगेपछि बालुवा फिल्टर भएर किसानको जमीनमा पानी पुग्ने उनको भनाई
छ ।
जल उपभोक्ता संस्थाका सह-सचिव एवं खैरेनी सिसौली बक्राहा नदी नियन्त्रण उपभोक्ता संस्थाका सचिव विजय गौतमले २ करोड रुपैयाँको लागतमा कोशी बक्राहा नदी नियन्त्रण आयोजनाले बाँध निर्माण गरेको बताएका छन् । उनले भने-‘बाँध निर्माण भएपछि पूर्व तर्फ खोलाले कटान गरेको करीब ५० बिगाहा जमीन किसानले उपभोग गर्न पाउने भएका छन् । बाँध निर्माण भएसँगै बर्सेनि असार लागेपछि बक्राहाको त्रासमा बाँच्ने खोला किनारका बासिन्दा पनि
खुसी भएका छन् ।’ इन्टेकबाट २ हजार १ सय मिटर लम्बाईको
नहर निर्माण गरिने गौतमले
जानकारी दिएका छन् । उनले भने- ‘यो वर्षको बजेटले २
हजार १ सय मिटर बाँध निर्माण
हुन्छ । सिंचाई आयोजना निर्माण सम्पन्न भएपछि उर्लाबारीको ११ हजार हेक्टर जमीनमा सिंचाई पुग्ने छ ।’ जलउपभोक्ता संस्थाका
अध्यक्ष निरौलाले भने- ‘१२ किलोमिटर बाँध निर्माण गर्ने लक्ष्य छ । १२ किलोमिटर बाँध निर्माण
गरिसक्दा रतुवामाई र उर्लाबारी
नगरपालिकाको २ हजार ५ सय हेक्टर जमीनमा सिंचाई सुविधा
पुग्नेछ ।’
पृथ्वी कन्सल्टेन्सी एण्ड इनर्जी गु्रप सर्लाहीले सरकारसँग आयोजना सम्पन्न गर्न १५ महिने सम्झौता
गरेको थियो । तर, निर्माण कम्पनीले बङ्गलादेशबाट कामदार ल्याएर आयोजना ४ महिनामा नै सम्पन्न गर्न लागेको अध्यक्ष निरौलाले बताएका छन् । उनलेले भने- ‘५० जना कामदारले २४ सै घण्टा काम
गरिरहेका छन् । उनीहरु राति पनि विजुली बालेर काम गर्छन् । झण्डै ९० प्रतिशत काम सम्पन्न भइसक्दा पनि सिंचाई विभागले निर्माण कम्पनीलाई ४४ लाख रुपैयाँ मात्र उपलब्ध गराएको छ ।’ त्यस्तै जलस्रोत तथा सिचाई डिभिजन कार्यालय मोरङका डिभिजनल इन्जिनीयर शैलेश पोख्रेलले तेस्रो चौमासिक फुकुवा भएर आएपछि कम्पनीले पैसा पाउने बताएका छन् । उनले भने - ‘१५ महिने आयोजना भएकोले बाँकी रकमका लागि केही समय कुर्नु पर्ने हुनसक्छ । तर, काम फाष्ट ट्रयाकमा भएकोले हामी त्यो पैसा पनि रोक्ने छैनौं ।’
सम्भव भएसम्म यो आर्थिक वर्ष भित्रै कम्पनीले पैसा पाउने इन्जिनीयर पोख्रेलको भनाई
छ ।
