भनिन्छ अभिनेतृको आयु फिल्मी क्षेत्रमा लामो हुँदैन । यौवन रहुञ्जेल बिकाउ हुन्छन् त्यसपछि टिकाउ हुँदैनन् भन्ने गरिन्छ । रुप र स्वरुपले टिकेका अधिकांश अभिनेतृमा यो केही हदसम्म लागु पनि होला तर केही अभिनेतृ हुन्छन् आफ्नो रुपसहित कलाले पनि टिकेका । यस्तै अभिनेतृ मध्ये एक थिइन् बलिउड अभिनेतृ श्रीदेवी ।
श्रीदेवी करिब ५० वर्ष फिल्मी क्षेत्रमा अनवरत रुपमा टिकेकी अभिनेतृ हुन् । ४ वर्षको उमेरमा अभिनय सुरु गरेकी श्रीदेवी ५४ वर्षको उमेरमा शनिवार यो संसारबाट विदा भइन् । आफ्ना भान्जा मोहित मारवाहको वैवाहिक कार्यक्रममा सहभागि हुन श्रीमान् बोनी कपूर र छोरी खुसी कपूरका साथ दुबई (संयुक्त अरब इमिरेट्स) पुगेकी उनलाई अचानक आएको कार्डियाक एरेष्टले ज्यान लियो ।
उनको सौन्दर्य, अभिनय कला र सम्मान लोभलाग्दो थियो । तर यो भन्दा बढी भने टिक्न सकेन ।
चार वर्षकै उमेरमा 'थुनाइवान' बाट ठूलो पर्दाका सिनेमा खेल्न थालेकी श्रीदेवीको अन्तिम फिल्म 'मोम' बन्यो । यी दश बुँदा जसले श्रीदेवीलाई नजिकबाट चिनाउँछन्ः
१) सन् १९६९ मा आइ एमए थिरुमुगम को फिल्म थुनाइवान मा श्रीदेवीले बालकलाकारको भूमिका निर्वाह गरेकी थिइन् । यो उनको पहिलो ठूलो पर्दाको फिल्म हो । जतिबेला उनी जम्मा ४ वर्षकी थिइन् ।
२) उनको वास्तविक नाम श्रीअम्मा यङ्गर अयप्पन हो । सिनेमामा आएपछि मात्रै श्रीदेवी राखिएको हो ।
३) अनिल कपूर र जितेन्द्रसँग श्रीदेवीको जोडी खुब जमेको बताइन्छ । जितेन्द्रसँग खेलेका १६ मध्ये १३ फिल्म सुपरहिट बनेका थिए ।
४) सन् १९८३ मा रिलिज भएको फिल्म 'सदमा' बाट श्रीदेवीको सर्वाधिक चर्चा भएको थियो । यो तमिल फिल्म 'मुन्दरम पिराई' को हिन्दी रिमेक भर्सन हो ।
५) श्रीदेवी यस्ती अभिनेतृ हुन् जसले धर्मेन्द्र तथा उनको छोरा सन्नी देवलसँग पनि अभिनय गर्न भ्याइन् ।
६) राजेश खन्नासँग खेलेका नयाँ कदम (१९८४), मकसद (१९८४), मास्टरजी (१९८५) र नजराना (१९८७) फिल्म सुपरहिट बनेका थिए ।
७) सन् १९८९ मा रिलिज भएको फिल्म चाँदनी बाट श्रीदेवी सुपरडुपर हिट नायिका बनेकी थिइन् । यश चोपडाको यो फिल्मपछि उनले लम्हे मा पनि काम गराएका थिए ।
८) श्रीदेवीले सन् १९८९ मा रिलिज भएको फिल्म चालबाज मा डबल रोल गरेकी थिइन् भने सन् १९९२ मा अमिताभ बच्चनसँग खेलेको फिल्म 'खुदा गवाह' मा पनि डवल रोल खेलेकी छिन् ।
९) सन् १९८७ मा रिलिज भएको फिल्म मिस्टर इण्डिया बलिउडकै पहिलो साइन्स फिक्सन फिल्म हो जसमा श्रीदेवीले खेल्ने अवसर पाएकी थिइन् ।
१०) भनिन्छ करियरको सुरुमा उनले खेलेका कतिपय फिल्ममा आफैँले भ्वाइस डबिङ गरेकी थिइनन् ।
