उर्लाबारी भदौं २२ गते
किराँत राई यायोक्खा उर्लाबारी नगर कार्य समितीले उर्लाबारीका निर्वाचित जनप्रतिनिधीहरुलाई बिहिवार सम्मान गरेको छ । यायोक्खाको भवनमा आयोजित कार्यक्रममा उर्लाबारी नगरपालिकाका मेयर खड्गबहादुर फागो,उपमेयर लक्ष्मी भण्डारी तथा बिभिन्न वडाका वडा अध्यक्ष तथा सदस्यहरुलाई सम्मान गरिएको हो । सम्मानित सबैलाई सम्मानपत्र हस्तान्तरण गरिएको थियो ।
सम्मान कार्यक्रममा बोल्दै मेयर फागोले धार्मिक तथा जातिय सद्भाव मुलुकमा आवश्यक रहेको बताएका छन् । सद्भावले मात्र एकआपसमा भाइचाराको सम्बन्ध स्थापित गर्ने उनको भनाई थियो । मेयर फागोले कला संस्कृति जर्गेनाको लागि बिभिन्न जातजातिको लागि सक्दो सहयोग पुर्याउने बताए । तर कसैले बजेटको दुरुपयोग गर्ने नहुने उनले बताए ।
यायोक्खाका अध्यक्ष केशरमान राईको सभापतित्वमा भएको कार्यक्रममा उपाध्यक्ष मानबहादुर राईको स्वागत तथा नारायण राईको सन्चालन रहेको थियो । यायोक्खाले राई जातिको हकहित र कला संस्कृति संरक्षणमा कामहरु गर्दै आएको सदस्य नुतन राईले बताएका छन् ।
