मोरङ । आफ्नो कार्यकाल नसकिँदै सुविधाको सरकारी गाडी फिर्ता गर्ने संभवत पहिलो नगर प्रमुख बनेका छन मोरङ उर्लाबारी नगरपालिका प्रमुख खड्ग फागो ।
कार्यकाल सकिन करिव डेढ महिना बाँकी रहदै शनिबार (चैत्र १९) कार्यक्रमवीच सरकारी गाडी फिर्ता गरेका हुन् । को १ झ ५७० नम्बरको नगरपालिकाको गाडी चढ्दै आएका थिए । फागोले चैत र बैशाख महिनाको अन्य सुबिधा (तलब,भत्ता) समेत नलिने घोषणा गरे ।
नेपाली कांग्रेस १ नम्बर प्रदेशका सहमहामन्त्रिसमेत रहेका फागोले काँग्रेसबाट निर्वाचित सबै जनप्रतिनिधिलाई सरकारी गाडी फिर्ता गर्न आव्हानसमेत गरेका छन् । यसैवीच उर्लाबारी नगरपालिका वडा नं. २ र ३ का वडा अध्यक्षहरुले समेत आइतबार स्कुटर नगरपालिकामा बुझाएका छन् । नगर प्रमुख मेयरले उपमेयर, वडाध्यक्ष तथा सदस्यहरुको रकम पनि भुक्तानी नगर्न लेखा प्रशासनलाई निर्देशन दिइसकेको बताए ।
उर्लाबारीमा मेयर फागो कांग्रेस र उपमेयर लक्ष्मीदेवी भण्डारी एमालेबाट निर्वाचित थिए । एमाले बहुमतमा थिए । प्रमुख फागोले एमालेको बहुमतको दम्भले कार्यकाल भर सहज रुपमा काम गर्न नदिएको बताउदै आएका थिए ।
नगरको जनप्रतिनिधिवीच कुरा नमिल्दा चालु आर्थिक बर्षमा टेन्डरबाट उब्रिएको र कन्टन्जेन्सी लगायतबाट बाँकी रहेको सात करोड रकम बिनियोजन नहुने भएको छ । कार्यपालिका बैठकमा उपप्रमुख भण्डारी नेतृत्वको बहुमत जनप्रतिनिधिले रकम बिनियोजन नगर्ने अडान राखेपछि बजेट नछल्ने भएको हो ।
नगर प्रमुख, उपप्रमुख कार्यकालभर आरोप, प्रत्यारोपमा बितेपनि फागो प्रशासनको कारण तुलनात्मक रुपमा अन्य पालिकाहरुमा भन्दा उर्लाबारीमा कर्मचारी लचक र सेवा भावमा प्रस्तुत भएको देखिन्थे ।
