मोरङ । मोरङको पथरीशनिश्चरे–१० मा भएको दोस्रो पिट्सबर्ग च्यालेन्ज कप–२०२२ को उपाधिको पुन बेलबारी एफसीले उचालेको छ ।
आज (सुक्रबार) भएको फाइनल खेलमा चारतारे युवा क्लव लेटाङ्गलाई ट्राइवेकरमा ४–२ गोल अन्तरले पराजित गर्दै उपाधि पुन बेलबारीले कब्जा जमाएको हो ।
खेल अवधिभर कुनै गोल नभएपछि निर्णय ट्राइवेकरबाट गरिएको थियो । ट्राइवेकरमा बिजेता बेलबारीको लागि निशान लिम्बू, मौसम सुब्बा, अभिशेक गुरुङ, सुरेन राईले गोल गरेका थिए भने बिल्सन गिरीले प्रहार गरेको गोल विपक्षी रक्षक टेकेन्द्र थापाले रोकेका थिए ।
चारतारे युवा क्लवको लागि अशोक खवास, जय गुरुङले गोल गरेपनि शुसिल राई र अभिशेक लिम्बूले गरेको गोल विपक्षी बेलबारीको रक्षक किशोर गिरीले राकेर आफनो टिमलाई उपाधी दिलाएका हुन् ।
फाइनल खेलको म्यान आफ द म्याच र बेष्ट किपरको बिजेता बेलबारीका गोल रक्षक किशोर गिरी घोषित भए । बेष्ट डिफेन्स, मिड फिल्डर र फरवार्ड चारतारे लेटाङका खेलाडी अभिशेक लिम्बू, जय गुरुङ र भुवान बस्नेत घोषित भए ।
सार्वधिक गोलकर्ता ३–३ गोल गर्ने बेलबारीका सौरव याक्खा र चारतारे लेटाङका रुपक लामा घोषित भए । बेष्ट कोच बेलबारी एफ.सी.का राजकुमार राई घोषित भए भने बेष्ट प्लेयर विवेक पौडेल घोषित भए । यो कपको अघिल्लो सिजन पनि बेलबारलिे जितेको थियो ।
प्रतियोगिताको प्रथम र दोस्रो हुने क्लवलाई क्रमस २ लाख १ हजार र १ लाख १ हजार नगद, ट्रफी र प्रमाणपत्र प्रदान गरिएको थियो ।
समापन कार्यक्रममा पथरीशनिश्चरे नगरपालिका प्रमुख मोहन तुम्बापो, उपप्रमुख देविमाया काफ्ले, लेटाङ नगरपालिका प्रमुख भुपेन्द्र लिम्बू लगायतको उपस्थिति रहेको थियो । यो सिजनमा मोरङ र झापाको ८ टिम सहभागी रहेका थिए । प्रतियोगिताको सम्पूर्ण खर्च अमेरिकामा बस्दै आएका नेपाली भाषी युवाहरुले ब्यबसथापन गर्दै आएका छन् ।
प्रदर्शनी खेलमा इलाका प्रहरी बिजयी
फाइनल अघि भएको प्रदर्शनी खेलमा इलाका प्रहरी कार्यालय पथरी र आयोजक भ्याटन टिमवीच प्रतिष्पर्धा भएको थियो । इलाका प्रहरी कार्यालय पथरीको प्रमुख डीएसपी बेदप्रसाद गौतम र आयोजक भ्याटन टिमको नेतृत्व संयोजक गणेश थक्लुङ लिम्बूले गरेका थिए ।
प्रदर्शनी खेल अवधिमा २ बराबरी गोल भएपछि भएको ट्राइवेकरमा ३–२ गोल अन्तरले प्रहरी बिजयी भएको थियो । प्रदर्शनी खेलको बिजेतालाई १५ र उपविजेतालाई १० हजार नगद प्रदान गरिएको थियो ।
फुटबल फाइनल कार्यक्रमपछि गायिका सुनिता थेगिम, गायक बिनोद खम्बू र अर्जुन विष्टले गीत गाएर उपस्थित दर्शकलाई मनोरञ्जन दिलाएका थिए ।
