मोरङ । माआवादी कोटाबाट पर्यटन, वन तथा वातावरण मन्त्री भएका गणेश उप्रेतीलाई आज पहिचानवादीहरुले मोरङको केराबारीमा कालो झण्डा देखाएर विरोध प्रदर्शन गरेको छ ।
मन्त्री उप्रेती इसाईहरुको क्रिसमस कार्यक्रममा केराबारी पुग्दा प्रदेश नं. १ पुन नामाङ्कन संयुक्त संघर्ष समिति केराबारी गाउँ पालिका समितिले कालो झण्डा सहित विरोध प्रदर्शन गरेको हो ।
प्रदर्शनकारीहरुले कोशी प्रदेश खारेज गर, सहिद लागेहाङ अमररहुन लगायतको नारा जुलुससहित बाटो छेक्न खोजेका थिए । प्रहरी स्कटिङमा आएका मन्त्री उप्रेति चढेको गाडिमा केही प्रहार समेत भएको भिडियो सार्वजनिक भएको छ ।
यसैवीच भोली (पुष ६) गते पार्टीको कार्यक्रममा प्रधानमन्त्री समेत रहेका अध्यक्ष प्रचण्ड मोरङको मिक्लाजुङ आउदै छन् । प्रचण्ड आउने कार्यक्रममा प्रदेशका मन्त्री र सांसदहरु सहभागी नगराउन संयुक्त संघर्ष समिति मोरङले आज विज्ञप्ति प्रकाशन गरी आग्रह गरेको छ ।
संघर्ष समितिको अध्यक्ष रामभक्त कुरुङ्बाङ, सचिव जयराज संयोग लिम्बूको हस्ताक्षर रहेको विज्ञप्तिमा आफ्नो आग्रहलाई अस्वीकार गरिए कालो झण्डासहित विरोध प्रदर्शन गर्न बाध्य हुने विज्ञप्तिमा उल्लेख छ । माओवादी केन्द्रले भने अध्यक्ष प्रचण्ड आउने कार्यक्रम शान्तिपूर्ण रुपमा समापन गर्न तोकिएका व्यक्तिहरु सहभागी नगराने जनाएको छ । यद्यपि पहिचानवादीहरु भने प्रचण्डको साथमा प्रदेशका मन्त्री÷सांसद आए विरोधको तयारी गरिरहेको बुझिएको छ ।
