हरि कोइराला
पथरी÷ पथरी बहुमुखी क्याम्पस, स्वतन्त्र विद्यार्थी यूनियनको आयोजनामा भएको १५ किलोमिटर म्याराथुन प्रतियोगिताको उपाधि कमल गाउँपालिका २ झापाका हर्कबहादुर ल्वागुनले जितेका छन् । जितसँगै उनले १५ हजार नगद र ट्रफि हात पारे ।
मंगलबार भएको दौडमा ल्वागुनले निर्धारित दुरी ४३ मिनेट ४५ सेकेण्डमा पुरा गरेका हुन । यस्तै बेलबारी–११का शेरबहादुर राई ४४ मिनेट ३३ सेकेण्डमा दुरी पार गर्दै दोस्रो पुरस्कार नगद १० हजार र ट्रफि जिते । ४५ मिनेटमा दुरी पार गरेका पथरीशनिश्चरे १० का महेन्द्र लिम्बूले तेस्रो हुँदै ५ हजारमा चित्त बुझाए । प्रतियोगितामा सान्त्वना पुरस्कार बिशाल राईले पाउनु भयो ।
प्रथम, दोस्रो, तेस्रो हुने खेलाडीलाई क्याम्पस प्रमुख चेतन पौडेल,नेविसंघका सह महामन्त्री कृष्ण कार्की, क्याम्पस सञ्चालक समिति अध्यक्ष मोहन न्यौपाने, मोरङ बस यातायात संघका अध्यक्ष धनकुमार तामाङले नगद सहित,ट्रफि,मेडल र प्रमाणपत्र प्रदान गर्नुभयो । खुल्ला दौडमा नेपाली सेना,नेपाल प्रहरी र सर्बसाधरणले भाग लिएका थिए । प्रतियोगितामा सहभागी भई निर्धारित दुरी पार गर्ने दुई बालकलाई समेत सोही अवसरमा नगद ५ सय सहित सम्मान गरिएको थियो । ७ वर्षीय आदित्य तिम्सिना र ८ वर्षीय पवन माझीले पनि पुरै १५ किलोमीटर दौड पुरा गरेका थिए । प्रतियोगितामा १६० जनाले भाग लिएका थिए । 
स्वतन्त्र विद्यार्थी यूनियनको स्थापना दिवसका अबसरमा आयोजित दौड प्रतियोगिताको प्रमुख आतिथ्यता पथरीशनिश्चरे नगरपालिकाकी उप प्रमुख यमुना विष्टले गरेकी थिइन ।
