मोरङ । जनसंख्याको असामन नीतिलाई व्यवहारिक बनाउनुपर्नेमा एक कार्यक्रममा सरोकारवालाहरुले जोड दिएका छन् ।
्स्वास्थ्य तथा जनसङ्ख्या मन्त्रालयले विराटनगरमा आइतबार आयोजना गरिएको जनसङ्ख्या नीति २०८१ मस्यौदा, जनसंख्या व्यवस्थापन र लैंगिक हिंसा सम्बन्धी अन्तक्रिया कार्यक्रममा बोल्दै सहभागि भएका सरोकारवालहरुले यस्तो बताएका हुन् ।
कार्यक्रममा बोल्दै प्रदेश योजना आयोग कोशीका उपाध्यक्ष डा. राजेन्द्र अधिकारीले नयाँ बन्ने जनसङ्ख्या नीति व्यवहारीक बनाउनुपर्ने बताए । राज्यले बनाउने नीति बसाइसराई रोक्ने खालको बनाउनुपर्ने उनले सुझाब दिए । ‘अहिले पहाडी क्षेत्रबाट तराइको जिल्लाहरुमा बसाइसराइ आउनेको संख्या वृद्धी भइरहेको छ,’ उनले भने, ‘बसाइ सराइ रोक्न राज्यले अब नीति बनाउनुपर्छ । अहिले जनसङ्ख्याको आधाभन्दा बढी हिस्सा तराईमा छ । पहाड र हिमाल खाली हुने क्रममा छ । त्यसैले अब कसरी हुन्छ पहाडमा बस्ती बसाउनु, त्यहाँको जनसङ्ख्यालाई त्यतै बस्न सक्ने वातावरण सृजना गर्ने नीति बनाउने समय आएको छ । जसरी हिजो पहाडबाट तराईमा पुनर्वास हुन चाहनेलाई निःशुल्क जग्गा सरकारले उपलब्ध गराएर मानिसलाई आकर्षण गरेको थियो । त्यसैगरी आज पहाडमा केही न केही सहुलियत दिएर मानिसलाई आकर्षण गर्नुपर्ने समय आएको छ ।’
कार्यक्रममा बोल्दै मुख्यमन्त्री तथा मन्त्रीपरिषद कार्यालय कोशी प्रदेशका सचिव केदारनाथ शर्माले जनसङ्ख्या नीतिलाई समय सापेक्ष बनाएर अगाडी बढनुपर्नेमा जोड दिए । कार्यक्रममा स्वास्थ्य तथा जनसंङ्ख्या मन्त्रालयका सहसचिब विनोद बहादुर कुँवरले अहिले आउन लागेको जनसंङ्ख्या नीति तीन तहको सरकारलाई समावेश हुने गरी ल्याउन लागेको बताए । सरकारले ल्याउने नीति प्रभावकारी कार्यन्वयनको लागि कोशी प्रदेशबाट सरोकारवालहरुसँग छलफल सुरु गरिएको उनले बताए । ‘यो छलफल र राय सुझाब सातै प्रदेशमा हुनेछ,’ उनले भने, ‘त्यसपछि नीति निमार्ण भएर कार्यन्वयनमा लैजानेछौं ।’
कार्यक्रममा जनप्रतिनधी, स्वास्थ्य क्षेत्रका चिकित्सक तथा कर्मचारी र सरोकारवालाहरुको सहभागि रहेको थियो ।
