झापा । प्रथम झापाली सगरमाथा आरोही अनिस लुइँटेलले फेरि सगरमाथा आरोहण गर्ने भएका छन् ।
आगामी वर्ष अमेरिकामा हुन लागेको ‘२४ औँ वल्र्ड स्काउट जेम्बोरी’को लोगो सर्वोच्च शिखर सगरमाथामा पुर्याउन आरोहणमा जान लागेको उनले शुक्रवार पत्रकार सम्मेलनमार्फत जानकारी दिए ।
यही चैत्र २५ गते शिखरमा पुग्ने लक्ष्यका साथ यसपटक चीनतिरको बाटोबाट सगरमाथा आरोहण गर्ने उनले बताए ।
मेचीनगर–९ का २४ वर्षीय अनिसले नेपालको नयाँ संविधान बोकेर २०७३ जेठ ८ गते पहिलोपल्ट नेपालतिरको बाटो भएर सगरमाथाको चुचुरो सफलतापूर्वक आरोहण गरेका थिए ।
यसअघिको उनको आरोहणका लागि विभिन्न दाता तथा संस्थाहरुबाट सहयोग एवम् ऋण लिनु परेको थियो । सहारा नेपाल साकोसबाट १० लाख रुपैयाँ लगायतको ऋण अझसम्म चुक्ता हुन सकेको छैन ।
यसपटकको आरोहणको खर्चका लागि अमेरिकाको स्काउटले व्ययभार व्यहोर्ने जानकारी दिदै उनले नगरपालिका लगायतका स्थानीय संस्थाहरुबाट समेत सद्भावपूर्वक सहयोग प्राप्त हुने अपेक्षा गरेका छन् ।
