२०७४ चैत्र ०४ आइतवार
काठमाडौँ — चैत्र ८ गतेदेखि हुने माध्यमिक शिक्षा परीक्षा एसईई को तयारी पूरा भएको राष्ट्रिय परीक्षा बोर्डले जनाएको छ ।
बोर्डका अनुसार ७७ वटै जिल्लामा सञ्चालन हुने परीक्षामा ४ लाख ८५ हजार ५ सय ८६ परीक्षार्थी सहभागी हुनेछन् ।
एक हजार ९ सय ५६ परीक्षा केन्द्रमा सञ्चालन हुने एसईईमा नियमिततर्फ ४ लाख ६१ हजार ५ सय १५ र एक्जाम्टेडतर्फ २४ हजार ७१ विद्यार्थी सम्मिलित हुने परीक्षा नियन्त्रक अम्बिका रेग्मीले जानकारी दिए ।
नियमितका ८ हजार ७ सय ३४ र एम्जाम्टेड तर्फका २० जना प्राविधिक धारका विद्यार्थीले पनि माध्यमिक शिक्षा कक्षा १० को परीक्षा दिने तयारी गरिरहेका छन् ।
चैत्र ८ गते बिहान ८ बजेबाट हुने परीक्षाको सबै तयारी पूरा भइसकेको उनले बताए । बोर्डको कार्यालय सानोठिमी भक्तपुरमा पत्रकार सम्मेलन गरेर आइतबार परीक्षाबारे जानकारी दिइएको हो ।
उत्तरपुस्तिका प्रश्नपत्रलगायत परीक्षा सञ्चालन गर्न आवश्यक पर्ने सामग्री जिल्ला हुँदै सम्बन्धित परीक्षा केन्द्रमा पुगिसकेका छन् उनले भने ।
जिल्ला परीक्षा समन्वय समितिहरुको निर्णयअनुसार देशभर एक हजार ९ सय ५६ केन्द्राध्यक्ष दुई हजार चार सय ५० सहायक केन्द्राध्यक्ष, २० हजार तीन सय ४० सहायक निरीक्षक, १० हजार ६ सय ७६ सहयोगी र २९ हजार तीन सय ४० सुरक्षाकर्मी गरी ६४ हजार ७ सय ६२ जनशक्ति परिचालन गर्ने तयारी भएको छ ।
१० वर्षपछि नयाँ पाठ्यक्रम अनुसारका प्रश्नपत्रको आधारमा परीक्षा हुन लागेको हो । यसपालिबाट अनिवार्य विषयतर्फ गणित बाहेक सबैमा प्रयोगात्मक परीक्षा हुने नयाँ व्यवस्था गरिएको छ ।
अक्षराङ्क पद्धतिमा सी ग्रेड र भन्दा तल्लो ग्रेड प्राप्त गरी ग्रेडवृद्धि गर्न नसकेका विद्यार्थीले एक्जाम्टेड परीक्षा दिन लागेका हुन् । साधारण धारतर्फ १७ गते र प्राविधिक धारतर्फको परीक्षा चैत्र २० गते सम्म सञ्चालन हुने परीक्षा बोर्डले जनाएको छ ।
परीक्षालाई मर्यादित, व्यवस्थित र अनुशासित बनाउन सबै प्रदेश समेटिने गरी बोर्डका पदाधिकारी शिक्षा मन्त्रालयका सहसचिव क्षेत्रीय शिक्षा निर्देशनालय जिल्ला समन्वय समितिका पदाधिकारी र जिल्ला शिक्षा कार्यालयका कर्मचारीको नेतृत्वमा अनुगमन टोली बनाइएको रेग्मीले बताए ।
बोर्डका अध्यक्ष चन्द्रमणि पौडेलले विद्यार्थीले आफ्नो क्षमता प्रस्तुत गर्ने वातावरण बनाउन सरोकारवालाहरुलाई अनुरोध गरे ।
परीक्षा प्रणाली परिवर्तन भएको छ विद्यार्थीले मनोवैज्ञानिक सन्त्रास पाल्नु जरुरी छैन ढुक्क भएर परीक्षा दिन आग्रह गछौं उनले भने ।
केन्द्रीय सुरक्षा समिति बैठक बसेर परीक्षाको शान्ति सुरक्षाको प्रबन्ध मिलाइएको उनले बताए ।
सुरक्षा संवेदनशिलता छैन, परीक्षाको मर्यादा विपरित कार्य गरे परीक्षा केन्द्र वा परीक्षार्थीको परीक्षा समेत रद्द गर्न सकिने छ उनले भने प्रचलित ऐन नियमअनुसार कारबाही गरिनेछ ।’
