२०७४ चैत्र ०६ मंगलवार
करोडौं प्रयोगकर्ताको निजी सूचना अनधिकृत रूपमा संकलन गरेको आशंकामा अनुसन्धान शुरु भएपछि सामाजिक सञ्जाल फेसबुकको शेयरमा भारी गिरावट आएको छ । सोमबार अमेरिकी शेयर बजारमा फेसबुकको शेयरमा ८ प्रतिशतसम्म गिरावट आएको बीबीसीले जनाएको छ ।
सन् २०१६ मा भएको अमेरिकी राष्ट्रपति डोनाल्ड ट्रम्पको चुनावी अभियानका क्रममा ‘केम्ब्रिज एनालिटिका’ नामक फर्मका पूर्वकर्मचारीले करिब ५ करोड फेसबुक प्रयोगकर्ताको विस्तृत विवरण अनधिकृत रुपमा संकलन गरेको पाइएपछि अनुसन्धान सुरु भएको हो ।
यसअघि अमेरिकाको म्यासाच्युसेट्सका महान्यायाधिवक्ता माउरा हेलीले फेसबुक र केम्ब्रिज एनालिटिकामाथि अनुसन्धान सुरु भएको बताउनुभएको थियो । हेलीले फेसबुक र केम्ब्रिजले यो घटनाबारे जवाफ दिनुपर्ने बताउनुभएको छ ।
तर फेसबुक र एनालिटिका दुवैले भने आफूहरूले कुनै गल्ती नगरेको दाबी गरेका छन् । आलोचकहरूले फेसबुकमाथि नियमन जरुरी रहेको बताएका छन् ।
उनीहरूले फेसबुक लगायतका सामाजिक सञ्जालमा भएका प्रयोगकर्ताका तथ्यांकहरू कहाँ, कसले र किन प्रयोग गर्छन् भन्ने नियमनका लागि कानुनी व्यवस्थाको माग समेत गरेका छन् ।
