विराटनगर, भदौ २७नेपालको पहिलो र चर्चित रियालिटी शो नेपाल आइडलका प्रतिस्पर्धी निशान भट्टराईको विराटनगरमा भव्य स्वागत गरिँएको छ । नेपाल आइडलको टप–३ मा पर्न सफल निशान आयोजक एपी वान टिभीको व्यवस्थापनमा गृह जिल्ला आएका हुन् ।
बिहान ११ बजे विराटनगर विमानस्थलमा उत्रिएका निशानलाई विमानस्थलमै भव्य स्वागत गरिएको थियो । उनको स्वागतमा ठूलो संख्यामा उनका शुभचिन्तक तथा आफन्तसमेत पुगेका थिए ।
विमानस्थलबाट बाहिरिएपछि कञ्चनबारीमा पनि निशानको स्वागत गरिएको थियो । हातमा फूलमाला बोकेर लामबद्ध शुभचिन्तकले उनको स्वागत गरेका थिए ।
स्वागतपछि कञ्चनबारी चोकमा निशानले आफ्ना शुभचिन्तका लागि केही गत गाएका थिए । उनले त्यहाँ उपस्थित शुभचिन्तकको आग्रहमा बिनाट्र्यायक ‘छोरीभन्दा आमा तरुनी’, ‘तुलसी आँगनमा रोपौंला’लगायत गीत गाए ।
मोरङ तथा विराटनगरका स्थानीयको बाक्लो उपस्थितिमा न्यानो स्वागत पाएका निशानले प्रस्तुति दिँदै आफूलाई धेरैभन्दा धेरै भोट दिएर नेपाल आइडल बनाउन सहयोग गर्न अपिलसमेत गरे ।
गत हप्ताको अन्तिम–४ बाट छनौट हुँदै टप–३ मा पर्न सफल तीनैजना प्रतियोगीलाई आयोजक एपी वान टिभीले आ–आफ्नो गृ हजिल्ला पठाएको हो । प्रतियोगीलाई परिवारसँग भेटघाट तथा प्रचारात्मक कार्यक्रमका लागि समय दिएको बताइएको छ ।
निशानबाहेक टप–३ मा परेका अन्य प्रतिस्पर्धी बुद्ध लामा र प्रताप दास पनि आ–आफ्नो गृह जिल्लातर्फ लागेका छन् ।
आज मोरङ झरेका निशानले विराटनगरपछि सुनसरीको इटहरीमा आजै आफ्ना शुभचिन्तकसँग भेटघाट गर्ने कार्यक्रम रहेको छ । त्यसक्रममा उनले केही प्रस्तुतिसमेत दिनेछन् ।
आजै उनले मोरङको पथरी र गृह नगर उर्लाबारी पुगेर विशेष प्रस्तुति दिने कार्यक्रम रहेको छ ।
