पथरी, ६ चैत
शिक्षा व्यवस्थापनको अधिकार स्थानीय तहमा आएपछि पहिलो पटक मोरङको पथरीशनिश्चरे नगरपालिका कार्यालयले नगर भित्रका विद्यालयहरुमा चैत ८ देखि गर्ने कक्षा ८ उतीर्ण परीक्षाको तयारी अन्तिम चरणमा पुगेको छ ।
नगरपालिकाको शैक्षिक व्यवस्थापन समितिमातहतको आधारभूत तह परीक्षा उतीर्ण समितिको वैठक बसेर परीक्षा व्यवस्थापनको तयारीका बारेमा छलफल गरेको छ । भोलीसम्ममा प्रश्नपत्र, उत्तरपुस्तिका सहितका सम्पूर्ण सामग्री विद्यालयहरुमा पुगसक्ने समितिले जनाएको छ ।
परीक्षा समितिका संयोजक रहनु भएका नगरपालिकाका प्रमुख प्रशासकीय अधिकृत पुरुषोत्तम घिमिरेको संयोजकत्वमा वसेको वैठकले शैक्षिक व्यवस्थापन समिति, नगरका प्रतिनिधि सहितको परीक्षा अनुगमन् समिति समेत निर्माण गरेको छ ।
परीक्षा चैत ८ देखि सुरु भएर चैत १८ गते सम्पन्न हुनेछ । परीक्षामा नगरका सामुदायिकतर्फ ९ सय २४ र संस्थागततर्फ ५ सय ३० जना गरी १ हजार ४ सय ५४ परीक्षार्थी सामेल हुनेछन् ।
नगरमा २८ वटा सामुदायिक र ३४ वटा संस्थागत विद्यालय रहेपनि कक्षा ८ सम्म पढाई भएका १८ सामुदायिक र १४ संस्थागत विद्यालयका विद्यार्थी परीक्षामा समावेश हुनेछन् ।
सामुदायिक र संस्थागत गरी १, १ जना विषयगत शिक्षकहरुलाई विषयगत प्रश्नपत्र निर्माणको जिम्मेवारी दिइएको थियो ।
प्रयोगात्मक परीक्षाको समय तालिका भनें विद्यालय आफैंले वनाएर सञ्चालन गर्ने निर्णय भएको स्रोत व्यक्ति गणेश दहालले बताउनु भएको छ ।
