२०७४ चैत्र १४ बुधवार
महोत्तरीमा चिटचोरीले व्यापकता पाउँदै गएको छ । एसइई परीक्षामा खटिएका महोत्तरीका प्रहरीको दिनचर्या अहिले अधिकांश परीक्षा केन्द्रबाट चिट संकलन गर्नु भएको छ ।
परीक्षा केन्द्रका झ्यालबाहिर फ्याकिएका चिट संकलन गर्न उनीहरू व्यस्त हुने गरेका छन् । मंगलबार मात्र अनुगमन टोलीले तीन बोराभन्दा बढी गेसपेपर गाइड संकलन गरेर जिल्ला प्रहरी कार्यालय महोत्तरीमा ल्याएको छ ।
परीक्षालाई मर्यादित बनाउन जिल्लाका सबै २९ परीक्षा केन्द्रका केन्द्राध्यक्षलाई जिल्ला शिक्षा कार्यालयले दिएको अनुशिक्षण कार्यक्रम वालुवामा पानी हाले सरह भएको छ ।
अधिकांश परीक्षा केन्द्रमा खटिएका शिक्षकहरूकै मिलोमतोमा चिटचोरी भइरहेको गुनासो आउन थालेपछि परीक्षा अनुगमन टोलीले कडाई गर्न थालेको छ ।
निरीक्षकहरू कारबाहीमा
प्रमुख जिल्ला अधिकारीको नेतृत्वमा रहेको एसइई परीक्षा अनुगमन टोलीले दुई नक्कली निरीक्षकसहित पाँचजनालाई निश्कासन गरेको छ ।
तेस्रो दिन गणित विषयको परीक्षामा साँढा परीक्षा केन्द्रबाट अरुणकुमार यादव र बल्वास्थित परीक्षा केन्द्रबाट सञ्जिव यादव निकालिएका छन् । दुवै नक्कली निरीक्षक थिए ।
प्रमुख जिल्ला अधिकारी बाबुराम श्रेष्ठले दुवै नक्कली शिक्षकलाई परीक्षामा खटाउन सिफारिस गर्ने विद्यालयमाथि अनुसन्धान सुरु भएको जानकारी दिए ।
कोल्हुवा बगेया परीक्षा केन्द्रबाट मो. इम्तियाज अन्सारी र साँढा केन्द्रबाट शत्रुधन चौधरी पनि निश्काशनमा परेका छन् । सुकदेव मावि सुगास्थित परीक्षा केन्द्रबाट एकजना कार्यालय सहयोगीसमेत निश्काशनमा परेका छन् ।
यो खबर आजको नयाँ पत्रिका दैनिकमा छापिएको छ
