काँकरभिट्टा । कार्यालय समयमा रक्सी खाएर तथानाम बोल्ने झापा मेचीनगर नगरपालिका वडा नम्बर २ का वडा अध्यक्ष तिलक न्यौपानेलाई इलाका प्रहरी कार्यालय काँकरभिट्टाले अब उप्रान्त यसो नगर्न सझाउँदै छोडिदिएको छ ।
बुधवार दिउँसो कार्यालय समयमा रक्सि खाएर लठ्ठ भएका न्यौपानेले मदिराको सुरमा तथानाम बोलेपछि स्थानीयले प्रहरीलाई खबर गरेका थिए ।
इलाका प्रहरी कार्यालय काँकरभिट्टाले न्यौपानेलाई कार्यालय कक्षबाटै पक्राउ गरेको थियो । उनको कार्यालय कक्षमा समेत पुरै रक्सिको गन्ध आएको थियो । पक्राउ पछि उनलाई आम्दा अस्पताल धुलावारीमा मापासे जाँच गरी अब आइन्दा यस्तो गल्ति नगर्न सुझाव दिँदै बुधवार साँझ छाडिएको थियो ।
मेचीनगर ६ का वडा अध्यक्ष ललित तामाङको रोहबर तथा नेकपा एमालेका जिल्ला सदस्य तथा मेचीनगर इन्र्चाज देवकुमार राई, एमाले नेता राम ओली डीएसपी टङ्कप्रसाद भट्टराईलगायतको उपस्थितिमा उनलाई परिवारको जिम्मा लगाइएको थियो ।
गत असार १४ गते नेकपा एमालेबाट निर्वाचित वडा अध्यक्ष न्यौपाने यस अघि पनि निरन्तर रक्सी खाने गरेका थिए ।
पार्टीले उनलाई यस अघि बारम्बार मापासे नगर्न सुझाव दिँदै आएका थिए । यसैगरी स्थानीय मानिसले पनि मेचीनगर नगरपालिकालाई उनको गतिविधिका बारेमा जानकारी स्वरुप निवेदन दिएका थिए ।
साविकको बाहुनडाँगी गाविसका पूर्व उपाध्यक्ष समेत रहेका न्यौपानेलाई यस अघि सुधार केन्द्रमा समेत लगिएको थियो । तर, उनी सुधार केन्द्रले पनि सुधार गर्न सकेको थिएन ।
यता मेचीनगर नगरपालिकाले भने अब बस्ने नगर बैठकमा यस विषयमा छलफलको विषय बनाएर लैजाने बताएको छ ।
