बिर्तामोड । झापाको बिर्तामोडस्थित वीरता जेसीज र काठमाडौं जेसीजबीच भगिनी सम्बन्ध स्थापित भएको छ ।
दुई संस्थाबीच भगिनी सम्बन्ध स्थापित गर्न सम्झौतामा वीरता जेसीजका अध्यक्ष एकराज गिरी र काठमाडौं जेसीजकी अध्यक्ष इनु थापाले हस्ताक्षर गरेका छन् । चितवनको सौराहामा भएको नेपाल जेसीजको २१औं काउन्सिलर एकाडेमीमा राष्ट्रिय अध्यक्ष श्रीधर बस्यालको रोहवरमा उक्त सम्झौता भएको हो ।
जेसीजहरुबीच भगिनी सम्बन्ध स्थापित गरी समाज परिवर्तनका लागि अग्रसर हुन राष्ट्रिय अध्यक्ष बस्यालको सोच अनुसार वीरता जेसीजले पहिलोपटक भगिनी सम्बन्ध स्थापित गरेको हो ।
वीरता जेसीज र काठमाडौं जेसीजबीच भगिनी सम्बन्ध स्थापित भएकोमा खुशी व्यक्त गर्दैै वीरता जेसीजका पूर्व अध्यक्ष एवम् नेपाल जेसीजका पूर्व राष्ट्रिय कार्यकारिणी उपाध्यक्ष विनोद बस्नेतले नेतृत्व विकास र सेवाको क्षेत्रमा जेसीजले धेरै कार्य गर्न सक्ने बताए ।
भगिनी सम्बन्ध स्थापनापछि दुई संस्थाबीचको सम्बन्ध प्रगाढ बन्नुका साथै व्यक्तित्व विकास, नेतृत्व विकास, सामाजिक कार्य र मानवीय सेवा क्षेत्रमा कार्यक्रम अघि बढाइने बताइएको छ ।
सन् १९८१ मा वीरता जेसीजको स्थापना भएको हो भने काठमाडौं जेसीजको स्थापना सन् १९७० मा भएको हो । नेपाल जेसीजका चार क्षेत्रमध्ये वीरता जेसीज क्षेत्र ‘क’ र काठमाडौं जेसीज ‘ग’ मा पर्दछ ।
