झापा, भदौ ३१ । मोफोसलमा रहेको फुटवल क्लव रमपम झापा ११ ले ‘ए डिभिजन’ क्लबको मान्यता पाएको छ । अखिल नेपाल फुटबल संघ एन्फाको शुक्रवार बसेको बैठकले रमपम झापा ११ लाई ए डिभिजनको मान्यता प्रदान गरेको हो । छोटो समयमा उत्कृष्ट प्रर्दशन गर्दै झापा ११ ले ए डिभिजनको मान्यता पाएको हो । झापा ११ सँगै मोफसलका अन्य तीन वटा क्लबले पनि ए डिभिजनको मान्यता पाएका छन् । मोरङ, रुपन्देही र सुदूरपश्चिम फुटबल क्लबले पनि ए डिभिजनको मान्यता पाएका हुन् । योसँगै ए डिभिजनको मान्यता पाउने क्लब संख्या १६ पुगेको छ ।
एन्फाले ए डिभिजनको लिग पनि होम एण्ड अवे पद्धतिमा खेल्ने निर्णय गरेको छ । एन्फाले मंसीरको दोस्रो साताबाट लिग आयोजना गर्ने समेत निर्णय गरिसकेको छ । झापा ११ले ए डिभिजनको मान्यता पाएसँगै झापाका खेलप्रेमी उत्साहित बनेका छन् । रमपम झापा ११का अध्यक्ष तथा एन्फाका केन्द्रीय सदस्य जलकुमार गुरुङले झापा ११ ले ए डिभिजनको मान्यता पाउनु भनेको खेल क्षेत्रमा झापाले नयाँ इतिहास रचे सरह हो भन्नुभयो । उहाँले ए डिभिजनको मान्यता पाउने श्रेय आफूमा मात्र नभई आम झापावासी र खेलप्रेमीको त्यत्तिकै माया र स्नेह छ भन्नुभयो ।
