उर्लाबारीःमोरङको उर्लाबारी–७ स्थित चेरी टमेटो होटलमा चर्चित गायक रामकृष्ण ढकालको एकल सांगितिक साँझ कार्यक्रमको तयारी अन्तिम चरणमा पुगेको छ ।
नेपालीहरुको महान चाड विजयीदशमीको अवसरमा असोज ५ गते हुने सो कार्यक्रमको तयारी अन्तिम चरणमा पुगेको हो । संगीतप्रेमी दर्शकहरुलाई लक्षित गरी आयोजना गर्न लागिएको उक्त सांगितिक कार्यक्रममा ५ सय भन्दा बढी दर्शकहरुको उपस्थिति रहने चेरी टमेटो होटलका सञ्चालक दिनेश श्रेष्ठले जानकारी दिएका छन् । करिब ३ लाख रुपैयाँ खर्च हुने अनुमान गरिएको उक्त कार्यक्रम प्रायोजन तथा टिकट बिक्रीबाटै हुने सञ्चालक श्रेष्ठको भनाई छ । सो कार्यक्रममा गायक ढकालले आधुनिक गीतसहितको आफ्ना चर्चित गीतहरु प्रस्तुत गरी दर्शकहरुलाई मनोरञ्जन दिने छन् । गायक ढकालको प्रस्तुति साँझ ४ बजेदेखि सुरु हुने आयोजकले जनाएको छ । यसअघि सोही होटलमा गायक स्वप्न सुनमले आफ्नो प्रस्तुति दिई युवाहरुको मन जितेका थिए ।
