उर्लाबारीःविजयीदशमीको अवसरमा मोरङको उर्लाबारीमा बृहत सांगितिक कार्यक्रम हुने भएको छ ।
भिजन फाउण्डेशन नेपाल, उर्लाबारीको आयोजनामा असोज ९ गते चर्चित ब्याण्ड कन्दरा र नेपाल आइडलको टप टेन प्रतियोगी केन्जलमेयर श्रेष्ठको प्रस्तुति रहने भएको हो । उर्लाबारी–७ स्थित पशुपति आमाबिमा हुने उक्त कार्यक्रममा ४ हजारभन्दा बढी दर्शकको सहभागिता रहने फाण्डेशनका अध्यक्ष राजु लामाले जानकारी दिएका छन् ।
फाउण्डेशनद्वारा सञ्चालित उर्लाबारी सार्वजनिक पुस्तकालय सहयोगार्थ आयोजित सांगितिक कार्यक्रममा ५ लाख ५० हजार रुपैयाँ खर्च हुने आयोजकले अनुमान गरेको छ । विजयीदशमीको शुभकामना आदानप्रदान गर्दै उर्लाबारीलाई संगीतमय बनाउने योजना रहेको अध्यक्ष लामाले बताएका छन् । उर्लाबारी नगरपालिकाका प्रमुख खड्गबहादुर फागोको प्रमुख आतिथ्यतामा हुने उक्त कार्यक्रमलाई भब्य र सभ्य बनाउन तयारी सुरु गरिसकेको जनाइएको छ । भिजनले शिव रात्रीमा पनि सांगितिक कार्यक्रम बर्षेनी गर्दै आएको छ । उक्त संस्थाले विगत लामो समयदेखि सामाजिक गतिबिधि गर्दै आएको छ ।
