४ असार २०७५
भीमराज अधिकारी, पथरी
यतिवेला नेपाल विद्यार्थी संघ (नेविसंघ) ले देशैभरी मुल्य वृद्धि भएको भन्दै विभिन्न कार्यक्रमहरु गरिरहेको छ । वर्तमान ओली सरकारले अस्वभाविक रुपमा मुल्य वृद्धि गरेको भन्दै विभिन्न चरणवद्ध आन्दोलन तथा विरोधका कार्यक्रमहरु सार्वजनिक गरिरहेका बेला मोरङको पथरीमा पनि नेविसंघले आइतबार साँझ मसाल जुलुस निकालेको छ ।
जुलुसका क्रममा प्रहरीले हस्तक्षेप गरेको थियो । मसाल जुलुस निकाल्न नदिन निर्देशन भएको भन्दै प्रहरीले आगो बालिएको मसाल खोस्ने प्रयास गरेको थियो ।
पथरी बहुमुखी क्याम्पस अगाडीबाट निकालिएको मसाल जुलुस पथरी बजारका विभिन्न चोक, बजार हुदैँ पूर्व पश्चिम लोकमार्ग स्थीत जनआन्दोलन चोकमा पुगेर कोण सभामा परिणत भएको थियो । कोणसभामा बोल्दै विद्यार्थी नेताहरुले वर्तमान ओली सरकारले सर्वसाधारण जनताको चुलो बल्न नदिएको भन्दै सरकारको आलोचना गरेका छन् । प्रहरीले पनि ओली सरकारको पुच्छर भएर हस्तक्षेप गर्नुको सट्टा जनताको समस्यामा सहयोगी बन्न अनुरोध गरेका छन् । जुलुसका क्रममा विद्यार्थीहरुले ओली सरकार मुर्दावाद, यस्तो सरकार चाहिँदैन लगाएतका नाराहरु लगाएका थिए । तत्काल मुल्यवृद्धि नघटाए विभिन्न चरणबद्ध आन्दोलनका कार्यक्रमहरु सार्वजनिक गरिने विद्यार्थी नेता रोशन पराजुलीले बताउनुभएको छ ।
यता नेपाल आयल निगमले डिजेल, पेट्रोल र मट्टितेलको भाउ घटाएको छ ।
पेट्रोलमा प्रतिलिटर ३ रुपैयाँ तथा डिजेल र मट्टितेलमा प्रतिलिटर २–२ रुपैयाँ भाउ घटाउने निर्णय गरेको हो ।
नयाँ भाउ अनुसार गए राती १२ बजेबाट लागु हुने गरी अब पेट्रोल लिटरको ११० रुपैयाँमा झरेको छ भने डिजेल र मट्टितेलको भाउ प्रतिलिटर समान ९३ रुपैयाँ भएको छ ।
भारतीय आयल कर्पोरशनको नयाँ मूल्यसूची अनुसार पेट्रोलियमको भाउ घटाइएको हो । नेपालमा प्रत्येक १५ दिनमा पेट्रोलियम पदार्थको नयाँ मूल्य कायम गरिन्छ ।
