पथरी, २० असोज । सिद्धान्त लोहनीको अल राउण्ड प्रदर्शन गरेपछि बिराटनगर क्रिकेट क्लबले मोरङको पथरीशनिश्चरे स्थित विरेन्द्रनगरमा जारी पूर्वाञ्चल स्तरीय सातौ वीरेन्द्रनगर च्यालेञ्ज कप क्रिकेट प्रतियोगितामा विजयी सुरुवात गरेको छ । बिहीबारबाट सुरु भएको प्रतियोगितामा किरात क्रिकेट क्लब दुधे झापालाई ८३ रनको फराकिलो अन्तरले पराजित गर्यो ।
बिराटनगरले दिएको १ सय ८९ रनको विजयी लक्ष्य पछ्याएर जवाफी ब्याटीङमा उत्रिएको दुधे १९ दशमलब १ ओभरमा मात्र १ सय ५ रनमा समेटियो । दुधेका लागि सचिन लिम्बुले सर्वाधिक २१ र प्रतिक लिम्बुले १७ रन बनाए ।
दुधेलाई सस्तैमा समेट्ने क्रममा ललित राजवंसीले ३ तथा सिद्धान्त लोहनी र अजय राजवंशीले समान २÷२ विकेट लिए ।
यसअघि टस जितेर पहिले ब्याटिङ गरेको बिराटनगरले निर्धारीत २० ओभरमा ८ विकेट गुमाउँदै १ सय ८८ रनको योगफल तयार पारेको थियो ।
बिराटनगरका लागि कप्तान सिद्धान्त लोहनीले २० बलमा ६१ रनको विस्फोटक पारी खेलेका थिए । त्यस्तै अजय राजवंशीले र नारायण श्रेष्ठले समान २३ रन बनाए ।
खेलको म्यान अफ द म्याच अलराउण्ड प्रदर्शन गरेका सिद्धान्त लोहनी घोषित भए । प्रतियोगिता अन्तर्गत शनिबारको खेल इस्टर्न बुलेट क्रिकेट क्लब दुहबी सुनसरी र पथरी ११ विच हुने आयोजकले जनाएको छ ।
तस्बिर म्यान अफ द म्याच लिदैँ सिद्धान्त लोहनी
