उर्लाबारी, ११ कार्तिक
मोरङको उर्लाबारी–८ स्थित दुर्गापुरीमा सोमबारदेखि प्रदेशस्तरीय नकआउट फुटबल प्रतियोगिता हुँदैछ ।
उर्लाबारी–८ दुर्गापुरीस्थित अरनिको माध्यमिक विद्यालयको प्राङ्गणमा हुने उक्त प्रतियोगिताको उद्घाटन उर्लाबारी नगरपालिकाका मेयर खड्ग फागोले गर्ने खेल संयोजक कमल फ्याँकले जानकारी दिए । उद्घाटन खेलमा मुनाल क्लब चन्द्रगढी (झापा) र विराट मेघा स्पोर्ट क्लब, विराटनगरबीच हुनेछ । उर्लाबारी नगरपालिकाको मुख्य सहयोगमा भएको उक्त प्रतियोतिाको सम्पूर्ण तयारी पूरा भएको आयोजकले जनाएको छ । कार्तिक १९ गतेसम्म चल्ने उक्त प्रतियोगितामा प्रदेश नं. १ का चर्चित आठवटा टिमको सहभागिता रहनेछ । प्रतियोगितामा प्रथम हुनेलाई दुई लाख तथा द्वितीय हुनेलाई एक लाख नगदसहित मेडल, ट्रफी र प्रमाणपत्र प्रदान गरिने आयोजकका सह–संयोजक सानु तामाङले जानकारी दिए । प्रत्येक खेलमा उत्कृष्ट खेल प्रस्तुत गर्ने खेलाडीलाई पाँच हजार नगदसहित पुरस्कृत गरिने जनाइएको छ । खेल हेर्न दर्शकलाई सहयोग स्वरुप ५० रुपैयाँ टिकट दर राखिएको खेल संयोजक फ्याँकले जनाए । हजारौं दर्शकले खेलको प्रत्यक्ष अवलोकन गर्ने उनले दाबी गरे ।
