काठमाडौ,२ मंसिर । शहिद स्मारक ए डिभिजन लिग फुटबलमा आज पनि दुई खेल हुदैछन् । ललितपुरको सातदोबाटोस्थित एन्फा कम्प्लेक्सको खेलमैदानमा आज हुने पहिलो खेलमा बिभागीय टिम नेपाल पुलिस क्लबले मछिन्द्र क्लबसँग प्रतिस्पर्धा गर्दैछ । खेल विहान ११ बजेदेखि सुरु हुनेछ । आफ्नो पहिलो खेलमा पुलिसले जावलाखेल युथ क्लबलाई पराजित गरेको थियो । मचिन्द्र क्लबले भने च्यासल युथ क्लबसँग बराबरी खेलेको थियो ।
त्यस्तै, एन्फा कम्प्लेक्समा आजै हुने दोस्रो खेलमा थ्रीस्टार क्लबले ब्रिगेड ब्वाइजसँग प्रतिस्पर्धा गर्दैछ । आफ्नो पहिलो खेलमा नै फ्रेन्ड्स क्लबलाई २–१ गोलअन्तरले पराजित गरेको थ्रीस्टार आजको खेलमा पनि स्पष्ट जितको खोजिमा हुनेछ । यता, ब्रिगेड ब्वाइज पनि थ्रीस्टारसँग अंक खोस्ने लक्ष्यमा रहेको छ । दोस्रो खेल दिउँसो २ बजेर ३० मिनेटमा सुरु हुनेछ ।
