उर्लाबारी । मोरङको उर्लाबारीमा सञ्चालित उर्लाबारी मेयर कप फुटवलको सोमबारको खेलमा वडा नं. ४ विजयी हुँदै सेमिफाईनलमा प्रबेश गरेको छ ।
उर्लाबारी – ६ स्थित राधिका माध्यमिक विद्यालयका खेल मैदानमा भएको खेलमा वडा नं. ८ लाई २ – १ गोल अन्तरले हराउँदै वडा नं. ४ सेमिफाईनलमा पुगेको हो । वडा नं. ४ को जितमा सन्तोष चौधरी र लेखु संकरले गोल गरेका थिए । वडा नं. ८ का लागि बादल धिमालले एक गोल फर्काएका थिए ।
मंगलवार वडा नं. २ र ३ बीच प्रतिस्पर्धा हुने आयोजक उर्लाबारी फुटवल क्लबका सचिव भिष्म बुढाथोकीले जानकारी दिए । प्रतियोगिताको उपाधि विजेताले नगद १ लाख ५० हजार रुपैयाँ र उपविजेताले नगद १ लाख रुपैयाँसहित ट्रफी, मेडल र प्रमाणपत्र प्राप्त गर्ने आयोजकका संयोजक विशाल तामाङले बताएका छन् । उर्लाबारी फुटबल क्लबको आयोजनामा दोस्रो पटक मेयरकप फुटबल आइतबारदेखि सुरु भएको हो ।
