काठमाडौं । इङ्लिस प्रिमियर लिग फुटबलमा दुवै म्यानचेस्टर विजयी भएका छन् ।
बुधबार राति भएको खेलमा म्यानचेस्टर सिटी, म्यानचेस्टर युनाइटेड, टोटनह्याम हट्सपर, लेस्टर सिटी र एभर्टन विजयी भएका छन् ।
म्यानचेस्टर सिटीले स्वान्सी सिटीलाई ४–० ले हरायो । म्यानचेस्टरलाई विजयी गराउन डेभिड सिल्भाले २ तथा सर्जियो अगुएरो र केभिन डे ब्रायनले १–१ गोल गरे ।
म्यानचेस्टर सिटीले लगातार १५ जित हासिल गर्ने कीर्तिमान पनि रचेको छ ।
अर्को खेलमा म्यानचेस्टर युनाइटेडले बर्नमाउथलाई १–० ले हरायो । रोमेलु लुकाकुले निर्णायक गोल गरे ।
टोटनह्याम हट्सपरले ब्राईटनलाई २–० ले, एभर्टनले न्युकासललाई १–० ले तथा लेष्टर सिटीले साउथह्याम्पटनलाई ४–१ ले हरायो ।
आर्सनल र लिभरपुलले भने बराबरी खेलेका छन् । आर्सनललाई वेष्टह्याम युनाइटेडले र लिभरपुललाई वेष्टब्रोमले गोलरहित बराबरीमा रोकेको हो ।
प्रिमियर लिगको अंक तालिकामा १७ खेलबाट ४९ अंक जोडेको म्यानचेस्टर सिटी शीर्ष स्थानमा छ । ३८ अंक जोडेको म्यानचेस्टर युनाइटेड दोस्रो स्थानमा छ ।
३५ अंक जोडेको चेल्सी तेस्रो स्थानमा रहेको छ । टोटनह्याम, लिभरपुल र बर्नलेको समान ३१ अंक छ ।
